Bolashaq stıpendıattary qaı elderde bilim alyp júr

ASTANA. QazAqparat - QR Bilim jáne ǵylym mınıstrligi «Bolashaq» halyqaralyq stıpendııasy ıegerleriniń qaı memleketterdi tańdaıtyny týraly aqparat berdi, dep habarlaıdy QazAqparat tilshisi.

«Qazirgi ýaqytta stıpendıattardyń 48,5% Ulybrıtanııa men Irlandııada bilim alyp júr, 36,2% - AQSh pen Kanadada, 5,8% - Eýropa elderinde, 5% - Azııa men Okeanııada jáne 4,5% - Reseı Federatsııasynda oqıdy», - delingen mınıstrliktiń «QazAqparat» HAA saýalyna jiberilgen resmı jaýabynda.

Mınıstrliktiń habarlaýynsha, «Bolashaq» stıpendıattary oqý ornyn bilim jáne ǵylym mınıstri buıryǵymen bekitilgen JOO tizimderi arasynan tańdaıdy. 2018 jylǵa arnalǵan tizimde halyqaralyq reıtıng agenttikteriniń (Times Higher Education, Academic Ranking of World Universities jáne QS World Universities Rankings) málimetterine sáıkes jalpy kórsetkishter boıynsha TOP-70 ýnıversıtet, mamandyqtar boıynsha TOP-20 ýnıversıtet tańdap alynǵan.

BǴM keltirgen málimetterge sáıkes, 25 jylda «Bolashaq» halyqaralyq stıpendııasy 12 974 úmitkerge berilgen. Qazirgi ýaqytta 1 243 stıpendıat bilim alýda, olardyń 13-i - bakalavr, 1053 - magıstratýra, 122 - doktorantýra boıynsha. Bireýi aspırantýrada oqyp jatyr, sondaı-aq 54 adam taǵylymdamadan ótýde.  

Odan bólek, qazaqstandyqtarǵa Germanııa, Frantsııa, Ispanııa, Italııa, Polsha, Vengrııa, Ońtústik Koreıa, Qytaı Halyq Respýblıkasy, Chehııa, Lıtva, Latvııa, RF jáne ózge de elderdiń joǵary oqý oryndarynda bilim alý úshin 20 myńǵa jýyq grant usynyldy.