«Bolashaq» stıpendıattarynyń shákirtaqysy qashan ósedi – mınıstr jaýaby
ASTANA. KAZINFORM – Ǵylym jáne joǵary bilim mınıstri Saıasat Nurbek «Bolashaq» stıpendıattarynyń shákirtaqysyn ósirýge qatysty pikir bildirdi.
- Shákirtaqyny arttyrý máselesi pisip-jetildi. Osydan 15 jyl buryn «Bolashaq» basshysy boldym jáne sol kezde eń sońǵy bolyp ındeksatsııa jasadym. Sol kezde shákirtaqy mólsherin arttyrǵan edik. Óıtkeni, London, Nıý-Iork syndy qalalardy ómir súrý óte qymbatqa túsedi. Sodan keıin shákirtaqy mólsheri qaıta qaralǵan joq. Sol sebepti jeke zertteý júrgizip, atalǵan qalalarda tutynýshy sebeti qunynyń qanshalyqty óskenin, ınflıatsııa qandaı ekenin qaradyq, - dedi mınıstr Úkimet otyrysynan keıingi brıfıngide agenttik tilshisiniń saýalyna oraı.
Onyń paıymynsha, qazirgi ýaqytta stıpendıattarynyń basym kópshiligine alyp júrgen shákirtaqylary jetpeıdi. Sondyqtan olar qosymsha jumys isteýge májbúr. Al bul bilim sapasyna keri áserin tıgizip, tipti «Bolashaq» stıpendııasynan aıyrylýǵa da alyp kelýi múmkin.
- Qazir bul máseleni pysyqtap jatyrmyz. Túpkilikti sheshim áli joq. Bul ne respýblıkalyq bıýdjetten qosymsha qarjylandyrýdy, ne stıpendııa sanyn qysqartý esebinen Halyqaralyq baǵdarlamalar ortalyǵynyń ishki bıýdjetin ońtaılandyryp, qarajattyń bir bóligin aı saıynǵy shákirtaqyny arttyrýǵa jumsaýdy talap etedi, - dedi Saıasat Nurbek.
Buǵan deıin Májilis depýtaty Magerram Magerramov «Bolashaq» baǵdarlamasy boıynsha granttan aıyrylǵan stıpendıattardyń qarajatty qaıtarýyn ındeksteýdi usynǵan edi.
