«Bolashaq» shahtasyndaǵy oqıǵa kezinde 200-den astam jumysshy jer ústine shyǵaryldy
AQTÓBE. KAZINFORM – «Bolashaq» shahtasynda jumys istep jatqan 228 jumysshynyń bári jerastynan joǵary shyǵaryldy. Qazirgi kezde oblystyq tótenshe jaǵdaılar departamenti jedel jelini iske qosty.
«Qazhrom» TUK» AQ fılıaly Dóń taý-ken baıytý kombınatynda bolǵan oqıǵadan soń shtab jumys istep jatyr. Oqıǵa ornynaAqtóbe oblysynyń TJD basshylyǵy, 20982 áskerı bóliminiń jáne TJM Apattar medıtsınasy ortalyǵynyń qyzmetkerleri bardy.
- Oqıǵa bolǵan kezde shahtada 228 qyzmetker boldy. Barlyq qyzmetker jer ústine shyǵaryldy. Shahtanyń jumysy ýaqytsha toqtatyldy. Hromtaý áskerılendirilgen taý-ken jasaǵy sýtekti ólsheý jumysyn júrgizip jatyr. TJM Komandalyq ortalyǵynyń ahýaldyq zalynda jáne TJD Daǵdarys ortalyǵynda jedel shtabtardyń jumysy uıymdastyryldy. Aqtóbe oblystyq TJD-da jedel jeli telefony (tel: 8-7132-54-86-82) iske qosyldy. Ázirge qońyraýlar túsken joq,- dep habarlady TJM baspasóz qyzmeti.
Eske salsaq, búgin Dóń ken-baıytý kombınatyndaǵy «Bolashaq» shahtasynda kenshilerdi kúıik shaldy. Polıtsııa taý-ken nemese qurylys jumystaryn júrgizý kezinde qaýipsizdik erejelerin buzý faktisi boıynsha qylmystyq isti tirkedi. Bir jumysshy jansaqtaý bóliminde jatyr.