«Bolashaq» shahtasyndaǵy avarııany tergeý jónindegi komıssııa quryldy

ASTANA. KAZINFORM – 27 mamyrda «Qazhrom Transulttyq kompanııasy» AQ fılıaly - Don taý-ken baıytý kombınatynyń «Bolashaq» shahtasynda bolǵan oqıǵaǵa baılanysty tótenshe jaǵdaılar vıtse-mınıstri Serik Tólenbergenov pen TJM Ónerkásiptik qaýipsizdik komıteti tóraǵasynyń orynbasary Keńgirbaı Eseneev Aqtóbe oblysyna bardy.

— Vıtse-mınıstr kásiporyn basshylyǵy men memlekettik organdar ókilderiniń qatysýymen keńes ótkizdi. Keńes qorytyndysy boıynsha vıtse-mınıstr Ónerkásiptik qaýipsizdik komıteti tóraǵasy orynbasarynyń tóraǵalyǵymen avarııany tergeý jónindegi komıssııa qurýdy tapsyrdy. Komıssııa avarııanyń mán-jaıy men sebepterin anyqtaıtyn bolady. Sýtegi shyǵaryndylarynyń qaıtalanýyna baılanysty jáne jumysshylardyń qaýipsizdigin qamtamasyz etý maqsatynda shahtadaǵy barlyq jumysty ýaqytsha toqtata turý týraly sheshim qabyldandy, — delingen TJM habarlamasynda.

Sonymen qatar sýtegi men basqa da ilespe gazdardy bólý máselesin, olardyń jumys júrgizý qaýipsizdigine áserin zertteý boıynsha ǵylymı-zertteý ınstıtýttaryn tartý qajettiligi atap ótildi.

— Vıtse-mınıstr aýrýhanada jatqan zardap shekkender adamdarǵa baryp, tez saýyǵyp ketýlerine tilektestik bildirdi, — delingen habarlamada.

Esterińizge sala keteıik, 26 mamyrda shahtada sýtegi bólinip, sodan keıin órt shyqty. Oqıǵa saldarynan úsh qyzmetker ártúrli dárejede kúıik aldy. 

Buǵan deıin habarlaǵanymyzdaı, Dóń taý-ken baıytý kombınatynyń «Bolashaq» shahtasyndaǵy ken óndirý blogynda elektr jabdyqtaryn montajdap jatqan úsh kezekshi elektroslesardi kúıik shaldy. Eki naýqas aýyr jaǵdaıda jansaqtaý bólimine jetkizilgen. Úshinshi naýqas travmatologııa bóliminde em alyp jatyr.

Eske salsaq, bıyl aqpan aıynda Hromtaý aýdanyndaǵy dál osy «Bolashaq» shahtasynda qysqa merzimdi tuıyqtalý bolyp, 4 jumysshyny kúıik shaldy. Kóp uzamaı bir jumysshy kóz jumdy. Sonymen qatar Dóń ken-baıytý kombınatyndaǵy oqıǵadan soń qylmystyq is qozǵaldy.