«Bolashaq» shahtasynda kúıik shalǵan úsh jumysshynyń ekeýi Astanada em qabyldap jatyr

AQTÓBE. KAZINFORM — Dóń taý-ken baıytý kombınatyndaǵy «Bolashaq» shahtasynda kúıip qalǵan jumysshylardyń ekeýi sanavıatsııa arqyly Astanaǵa jetkizildi. Bireýi Aqtóbede em alyp jatyr.

Aqtóbe oblystyq densaýlyq saqtaý basqarmasynyń habarlaýynsha, naýqastardyń jaǵdaıy turaqty aýyr. 

— Eki naýqas sanavıatsııa arqyly Astana qalasyna jiberildi. Olar elordadaǵy respýblıkalyq ortalyqta emin jalǵastyrady. Al bireýi kópsalaly oblystyq aýrýhanasyna tasymaldandy. Jaǵdaıy turaqty aýyr, — dep habarlady Aqtóbe oblystyq densaýlyq saqtaý basqarmasynyń baspasóz qyzmeti.

Aıta keteıik, 26 mamyr kúni saǵat 22:30–da «Bolashaq» shahtasynyń ken óndirý blogynda qysqa merzimdi tutaný boldy. Elektr jabdyqtaryn montajdap jatqan úsh kezekshi elektroslesardy kúıik shaldy. 

27 mamyrda «Qazhrom Transulttyq kompanııasy» AQ fılıaly — Don taý-ken baıytý kombınatynyń «Bolashaq» shahtasynda bolǵan oqıǵaǵa baılanysty tótenshe jaǵdaılar vıtse-mınıstri Serik Tólenbergenov pen TJM Ónerkásiptik qaýipsizdik komıteti tóraǵasynyń orynbasary Keńgirbaı Eseneev Aqtóbe oblysyna keldi. Sol kezde shahtadaǵy barlyq jumysty ýaqytsha toqtata turý týraly sheshim qabyldandy.