Bolashaq saıasattanýshy: Saılaý - memleketti basqarý isine qatysýdyń birden-bir joly

QARAǴANDY. QazAqparat – Pandemııaǵa saılaýdyń ótýine kedergi bola ma degen qaýip seıilip, daýys berý qarqyndy ótýde. Árbir qazaqstandyq azamat memleketti basqarý isine qatysyp, saılaýda daýys bergeni jón, deıdi bolashaq saıasatker Eldos Jumaǵulov.

Búgin L.N. Gýmılev atyndaǵy EUÝ 3-kýrs doktoranty Eldos Jumaǵulov konstıtýtsııalyq quqyǵyn paıdalanyp, saılaýda daýys berdi.

Bolashaq saıasattanýshy qaraǵandylyq jerlesterin azamattyq paryzyn oryndaýǵa shaqyrdy.

«Árıne, saılaýǵa qatysý, qatyspaý - árkimniń óz erki. Biraq elimizdiń bolashaǵyna beıjaı qaramaıtyn azamat óz boryshyna nemquraıdy qaramaǵany jón. Saılaý memleketti basqarý isine qatysýdyń birden bir joly.

Bul saılaýdyń erekshelikterine atap ótetin bolsaq, eń birinshiden, pandemııaǵa qatysty karantın shekteýleri aıasynda ótkizilip otyr, epıdemıologııalyq jaǵdaıdyń asqynýyna oraı saılaýdy ótkizýge kedergi bola ma degen qaýip bolǵan.

Jaǵdaıdyń birshama turaqtanýy saıası naýqandy ýaqytynda ótkizýge múmkindik berdi.

Ekinshiden, saılaý týraly zańnamaǵa engizilgen ózgeristerge sáıkes, jergilikti máslıhat saılaýy jańa proportsıonaldyq júıe boıynsha ótýde», - deıdi Eldos Jumaǵulov.