«Bolashaq sáýletshileri» qorynyń negizin qalaýshy Marat Ábıevke jańa úkim shyǵaryldy
ASTANA. KAZINFORM — 2025 jyly 14 aqpanda Astana qalasynyń mamandandyrylǵan aýdanaralyq sotynyń úkimimen «Bolashaq sáýletshileri» qorynyń negizin qalaýshy Marat Ábıev pen onyń sybaılastary sottaldy.
— Marat Ábıev Qylmystyq kodeksiniń 262-babynyń 1-tarmaǵy (uıymdasqan topty qurý jáne basqarý, sondaı-aq oǵan qatysý), 197-baby 4-tarmaǵynyń 1-tarmaqshasy (munaı men munaı ónimderin zańsyz satyp alý, satý, saqtaý jáne tasymaldaý, sondaı-aq olardyń zańdylyǵyn rastaıtyn qujattarsyz óńdeý), 234-babynyń 3-tarmaǵynyń 2-tarmaqshasy (ekonomıkalyq kontrabanda) boıynsha 9 jylǵa bas bostandyǵynan aıyryldy, sondaı-aq memlekettik qyzmette ómir boıyna laýazym atqarýǵa tyıym salynyp, qoǵamdyq birlestikterdi qurýǵa jáne basshylyqqa alýǵa baılanysty qyzmetpen 5 jyl merzimge aınalysý quqyǵynan aıyryldy, — delingen habarlamada.
Onyń sybaılastary 8 jylǵa bas bostandyǵynan aıyryldy.
Sot sheshimi boıynsha aıyptalýshylardyń múlki tárkilenip, olardyń kontrabandalyq jolmen alynǵan 6 mlrd teńgeden astam qylmystyq tabysy tárkilendi.
Buǵan deıin agenttik Marat Ábıev pen onyń sybaılastary — Anton Novıtskıı, Janibek Darıbaev, Evgenıı Grebnev, Amanaı Mahmetov — qatysty aldyn ala tergeý aıaqtalǵanyn habarlaǵan bolatyn.
— 2018-2022 jyldar aralyǵynda atalǵan tulǵalar uıymdasqan top quryp, Aqtóbe oblysyndaǵy MÓZ-da EAEO aýmaǵynda kólemi 50,6 myń tonna bolatyn satýǵa tyıym salynǵan «K-2» ekologııalyq klasty dızel otynyn óndirgen. Keıin bul dızel otyny basqa munaı ónimi retinde 11,3 mlrd teńgege satyldy, sonyń ishinde 22,6 myń tonnasy 6,7 mıllıard teńgege shetelge kontrabandalyq jolmen shyǵaryldy. Munaı ónimderiniń zańsyz aınalymynan túsken qylmystyq tabys arqyly «Genesis» (nemese «Bolashaq sáýletshileri») atty zańsyz qoǵamdyq birlestiktiń qyzmeti qarjylandyrylǵan, ony quryp basqarǵany úshin 2023 jyldyń 21 tamyzynda Marat Ábıev 7 jylǵa bas bostandyǵynan aıyrylǵan bolatyn, — delingen habarlamada.
Sot úkimi áli zańdy kúshine engen joq.
Aıta ketelik BQO-da 1,5 mln teńge para alǵany úshin sáýlet jáne qala qurylysy bóliminiń basshysy sottaldy.