«Bolashaq oıyndaryna» 20 myń týrıst keledi
ASTANA. KAZINFORM — «Bolashaq oıyndarynyń» bastalýyna nebári bir kún qaldy. Sport pen zamanaýı tehnologııany toǵystyrǵan halyqaralyq týrnır 29 shilde men 9 tamyz aralyǵynda Astanada ótedi. Jarystyń ereksheligi men bıylǵy jańalyqtary týraly týrnırdiń uıymdastyrýshysy Dáýren Temirhanov Jibek Joly telearnasynyń «Búgin Live» baǵdarlamasynda aıtty.
Spıkerdiń aıtýynsha, týrnırdiń basty ereksheligi – dástúrli sport pen tsıfrlyq álemdi biriktiretin fıdjıtal format.
– Fıdjıtal – áýeli qatysýshylar kompıýterde, konsolde nemese VR ortasynda tsıfrlyq saıysqa túsedi, sodan keıin naqty fızıkalyq alańda (mysaly, shaǵyn fýtbol nemese rıng) kúsh synasady. Týrnırge 50-den astam elden 800-den asa qatysýshy keledi dep kútilýde. Olardyń qatarynda Team Spirit, Team Falcons, T1, Xtreme Gaming, Vici Gaming sekildi álemge tanymal komandalar bar. Jarystar 8 sporttyq dıstsıplına boıynsha ótedi. Qazaqstan úshin mundaı halyqaralyq týrnırdi ótkizý týrıstik áleýetti arttyrýǵa múmkindik beredi. Elge shamamen 20 myńnan astam týrıst keledi dep boljap otyrmyz, – dedi ol.
Halyqaralyq týrnırdi álemniń kez kelgen núktesinen onlaın tamashalaýǵa bolady. Sonymen qatar jarystar Astanadaǵy tórt arenada ótedi.
– Onlaında 3 mlrd-tan astam kórermen tamashalaýy múmkin. Onyń ústine Astanada da qyzyǵýshylyq tanytqan kórermen kóp. Bıletter satylymda. Baǵalary 4 myńnan 10 myń teńgege deıin barady. Jarys kesteleri oıynnyń resmı saıtynda qoljetimdi. Jarystar 4 arenada ótedi. Erekshe atap ótý kerek, qazir elimizde fıdjıtal sport baǵyty qarqyndy damyp keledi. Bıyl týrnırde el namysyn 11 qazaqstandyq komanda qorǵamaq, – dedi spıker.
Bıylǵy týrnırdiń jalpy júlde qory 4,5 mln AQSh dollarynan asady.
Uıymdastyrýshylardyń aıtýynsha, sporttyq básekelermen qatar, jankúıerler úshin arnaıy shoý-baǵdarlamalar da uıymdastyrylady.
Buǵan deıin kıbersporttyń álemdik juldyzdary Astanaǵa kelip jatyrǵanyn jazǵan edik.
