«Bolashaq oıyndary»: qazaqstandyq fıdjıtal fýtbolshylar basty qarsylastaryn atady
ASTANA. KAZINFORM – Fıdjıtal fýtbolda komandalyq úılesim sheshýshi ról atqarady. Bul týraly «Bolashaq oıyndaryna» qatysyp jatqan qazaqstandyq sportshylar Jibek Joly telearnasynyń «Búgin Live» baǵdarlamasynda aıtty.
Baǵdarlamaǵa Aqtóbe oblysynan áýesqoı fýtbolshy Nurálem Baıdýlla, Oral qalasynan kıbersportshy Álisher Muqanálı jáne Mańǵystaý oblysynan Talǵat Ótepbergenov qatysty.
Nurálem Baıdýllanyń aıtýynsha, komanda búgingi deńgeıge birneshe halyqaralyq jarysta tájirıbe jınaqtaý arqyly jetken.
– Úsh jyl kóleminde kıbersporttyń aınalasynda júrmin. Alǵashqyda Qazaqstan ulttyq quramasynyń Kazandaǵy BRIKS oıyndaryn tamashalap, qyzyǵýshylyǵym oıandy. Sodan keıin kıberfýtbolmen aınalystym. Kelesi jyly Qazaqstan chempıonatynda jeńiske jettik. Odan keıin Contenders oıyndarynda da top jardyq, – dedi Nurálem Baıdýlla.
Jınaqtalǵan tájirıbe «Bolashaq oıyndaryna» daıyndyqta eskerilgen. Komanda taktıkalyq jáne fızıkalyq jattyǵýlardy qatar júrgizip, oıynnyń ár kezeńin pysyqtaǵan.
– Bul úlken mehanızm sekildi. Birinshi jáne ekinshi taımda tórt kıbersportshy oınaıdy, keıingi eki taımda tórt fýtbolshy alańǵa shyǵady. Fıdjıtal fýtbolda borttar bar, qaqpa úlken, aýt bolmaıdy. Ár taım bes mınýttan ótedi. Bapkerler borttan qaıtqan doptyń traektorııasyn zerttep, soǵan qaraı baǵyt beredi, – dedi Álisher Muqanálı.
Daıyndyq tek jattyǵýmen shektelmegen. Sportshylar joldastyq kezdesý ótkizip, bolashaq qarsylastarynyń oıyn mánerin taldaǵan.
– Kásipqoı fýtbolshymyn. Bir apta buryn joldastyq kezdesý ótkizdik, keshe de jattyqtyq. Ózge komandalardy da taldap jatyrmyz. Alǵashqy qarsylasymyz – Brazılııa. Jalpy jarysqa 16 komanda qatysady. Qazir bapkerler oıyn josparyn ázirlep jatyr. Biz soǵan saı áreket etemiz, – dedi Nurálem Baıdýlla.
Sportshylardyń baǵalaýynsha, jarysta Ispanııa men Meksıka quramalary negizgi favorıtterdiń qatarynda. Soǵan qaramastan olar Qazaqstandaǵy kıberfýtboldyń áleýeti artyp kele jatqanyna senimdi.
– Bolashaqta Qazaqstannan tanymal kıbersportshylar shyǵýy múmkin, – dep sanaıdy sportshylar.
Aıta keteıik, Qazaqstan atynan atalǵan saıysqa PUBG boıynsha jalǵyz komanda qatysady.
