«Bolashaq oıyndary»: qazaqstandyq faıter Nurjigit Baımen alǵash ret Phygital Fighting dodasyna qatysady
ASTANA. KAZINFORM — 8 tamyzda Astanada ótip jatqan halyqaralyq Bolashaq oıyndary aıasynda Phygital Fighting dıstsıplınasy boıynsha jarystar bastalady. Elimizdiń namysyn qorǵaıtyn sportshylardyń biri Nurjigit Baımen Jibek Joly telearnasynyń «Búgin LIVE» baǵdarlamasynda jarys aldyndaǵy daıyndyǵymen bólisti.
DAR TEAM klýbynyń sportshysy Nurjigit Baımenniń aıtýynsha, jarysqa qatysý týraly usynys oǵan týrnır bastalardan úsh apta buryn túsken.
Sportshy qysqa ýaqyt ishinde salmaq qýyp, jarysqa daıyndalǵanyn aıtty.
— Maǵan usynys tústi, úsh apta qalǵanda kelisim berdim. Salmaq jasaý mindetti boldy. Búgin ólsheýden óttik, bári jaqsy. 61,7 kelide óner kórsetemin. Uıymdastyrý deńgeıi óte joǵary, — dedi Nurjigit Baımen.
Onyń aıtýynsha, Phygital Fighting klassıkalyq jekpe-jekten ózgeshe formatymen erekshelenedi.
— Shynymdy aıtsam, kompıýter oıyndaryna qatty qyzyqpaımyn. Jumys, jattyǵý, ýaqyt ta kóp bolmaıdy. Biraq bul format qyzyq eken. Áýeli vırtýaldy jekpe-jek ótkizesiń, sodan keıin birden oktagonǵa shyǵasyń. Biz úshin bul jańa tájirıbe, jańa emotsııa, — dedi sportshy.
Nurjigit Baımen jerebe nátıjesinde tájirıbeli qarsylaspen kezdesetinin atap ótti. Qarsylasy Tájikstannyń tájirıbeli sportshysy.
Sonymen qatar sportshy jarystyń upaı esepteý júıesiniń de ereksheligine toqtaldy.
— Bul jarysta oıynnan alǵan upaı men oktagondaǵy jekpe-jekten alǵan upaı birge esepteledi. Eger birinshi raýndta jeńseń, segiz upaı beriledi, keıingi raýndtarda upaı ózgeredi. Sońynda barlyq nátıje komandalyq esepke qosylady, — dedi Nurjigit Baımen.
Aıta keteıik, buǵan deıin, Astanadaǵy týrnırdiń qaralymy 85 mln-ǵa jetkenin jazǵan edik.
