«Bolashaq oıyndary»: Astanada erekshe hokkeı jarysy ótti
ASTANA. KAZINFORM – Shaıbaly hokkeıden «Bolashaq oıyndary» týrnıri aıasynda «fıdjıtal hokkeı» formaty boıynsha jasóspirimder synǵa tústi.
Astana qalalyq sport basqarmasy málim etkendeı, fıdjıtal hokkeıdiń ereksheligi — jasóspirimder bastapqyda playstation qurylǵysynda 3×3 formaty boıynsha 9 mınýtta myqtyny anyqtaıdy. Ekinshi kezekte dál osy esep saqtalyp, hokkeıshiler ary qaraı muz aıdynynda 7 mınýttan turatyn 3 kezeńde oınap, jalpy jeńimpaz anyqtalady.
Týrnırge Astana qalasynyń 6 komandasy qatysty.
Bundaı oıyn tek Reseıdegi «Bolashaq oıyndarynda» ǵana uıymdastyrylady. Qazaqstanda alǵash ret ótkizilip jatyr. Birinshi ret bolǵan soń, qatysýshylardyń sany azdaý. Degenmen, jyl sońyna deıin taǵy 1-2 jarys ótkizý oıda bar. Úmitkerlerdiń de sany artady dep senemin. Bunyń barlyǵy 2026 jyly elimizde ótetin «Bolashaq oıyndaryna» daıyndyq dese de bolady.
Týrnırdiń basty maqsaty — jasóspirimderde sport pen kıbersportty biriktirip, fızıkalyq jáne oılaý turǵysyn birge damytý — dedi, jarystyń uıymdastyrýshysy Vıacheslav Borısov.
Aıta keteıik, elimizde «Bolashaq oıyndary» kóp sportty halyqaralyq týrnırin ótkizý 2025 jyldan 2026 jylǵa aýystyrylǵan bolatyn.
Osyndaı báseke men úshin tańsyq. Sebebi, osy kúnge deıin tek hokkeıge mán berip kelip edim. Playstation-da hokkeı oınaý dárejem joǵary emes. Aldaǵy ýaqytta kıbersport jaǵyna mán beretin bolamyn — dep, Abzal atty jas hokkeıshi óz áserimen bólisti.
Týrnır qorytyndysy boıynsha, «Nomad-1» komandasy top jarsa, «Nomad-2» ujymy 2-oryn, «Astana-1» komandasy úzdik úshtikti túıindedi.
Sondaı-aq, jasóspirimder muz aıdyny men digital saıystarynda da úzdik nomınatsııalarmen marapattaldy.