Bolashaq oıyndary: 29 shilde men 9 tamyz aralyǵynda Astanada kórermenderdi ne kútedi
ASTANA. KAZINFORM — Astanada eń iri halyqaralyq sporttyq týrnırlerdiń biri — «Bolashaq oıyndary — 2026» (Games of the Future 2026) dodasy ótedi, dep habarlaıdy elorda ákimdiginiń resmı saıty.
Jarystar 29 shilde men 9 tamyz aralyǵynda ótip, klassıkalyq sport pen tsıfrlyq tehnologııalardy ushtastyratyn saıystarǵa álemniń túkpir-túkpirinen kelgen sportshylardyń basyn qosady.
Týrnır elordanyń birneshe iri sport nysanynda ótedi. Negizgi jarys alańdary retinde kópfýnktsıonaldy «Barys Arena» muz saraıy, Beeline Arena ulttyq tennıs ortalyǵy, Qazaqstan jeńil atletıka sport kesheni jáne Jaqsylyq Úshkempirov atyndaǵy Jekpe-jek saraıy belgilendi.
12 kún boıy qatysýshylar fıdjıtal-fýtbol, basketbol, hokkeı, jekpe-jek, boks, bı baǵyttary, shýterler, Battle Royale, MOBA, dron jarysy, Battle Bots jáne jańa formattaǵy ózge de sport túrlerinen baq synaıdy.
Bolashaq oıyndarynyń basty ereksheligi — sportshylar aldymen vırtýaldy keńistikte sheberlikterin kórsetip, keıin jarysty naqty sport alańynda jalǵastyrady.
Týrnırge álemdik sport pen kıbersporttyń tanymal ókilderi qatysady. Olardyń qatarynda Team Spirit, T1, Team Falcons, Boca Juniors, Valencia Basket, LGD.Pinghu jáne NOVAQ komandalary bar.
Bolashaq oıyndary — 2026 jarysynda Qazaqstan atynan barlyq segiz dıstsıplına boıynsha komandalar men sportshylar óner kórsetedi. Júldeler úshin ACF x Allur, UEL Team, GTB KZ, PBC Astana, Future Nomads, Rune Eaters, DIGA Esports, NOVAQ, TeamKZ komandalary jáne sportshy Gúlnaz Amanǵalı baq synaıdy.
Týrnırge álemniń ár elinen júzdegen sportshy men myńdaǵan jankúıer keledi dep kútilýde. Osylaısha Astana eki apta boıy fıdjıtal-sporttyń álemdik ortalyǵyna aınalady.
Bolashaq oıyndary — 2026 Qazaqstan úshin jyldyń eń iri halyqaralyq oqıǵalarynyń birine aınalmaq. Aýqymdy týrnır elordanyń zamanaýı sport ınfraqurylymyn tanystyryp qana qoımaı, Qazaqstannyń álemdik deńgeıdegi iri jarystardy ótkizý alańy retindegi bedelin nyǵaıta túsedi.
Kórermenderge týrnırdiń jeke kúnderine de, birneshe jarys kúnine de bılet satyp alý múmkindigi qarastyrylǵan. Jarys kestesimen tanysyp, ózińizdi qyzyqtyratyn dıstsıplınalardy tańdap, bıletterdi Bolashaq oıyndarynyń resmı saıtynan alýǵa bolady.
Buǵan deıin Astanadaǵy týrnırge 50-den asa elden adam keletinin jazdyq.
