«Bolashaq oıyndary – 2026» týrnırine qatysý úshin Astanaǵa mártebeli qonaqtar kelip jatyr
ASTANA.KAZINFORM – «Bolashaq oıyndary – 2026» (GOTF 2026) powered by Samruk-Kazyna halyqaralyq týrnırine qatysý úshin Astanaǵa mártebeli qonaqtar keldi, dep habarlaıdy QR Týrızm jáne sport mınıstrliginiń baspasóz qyzmeti.
Baspasóz qyzmetiniń málimetterine qaraǵanda, elordadaǵy halyqarlyq áýejaıǵa Tájikstan Ulttyq olımpıadalyq komıtetiniń vıtse-prezıdenti Dılshod Jamolıdınovıch Nazarov pen Túrki memleketteri uıymynyń Bas hatshysy Kýbanychbek Ómirálıev jáne Ázerbaıjan Respýblıkasynyń Jastar jáne sport mınıstri Farıd Fazıl oǵly Ǵaıbov sporttyq delegattarmen birge kelip jetti.
Áýejaıda mártebeli qonaqtardy Qazaqstan Respýblıkasy Týrızm jáne sport mınıstriniń orynbasary Mıras Tólebaev qarsy alyp, qazaq halqynyń ulttyq salt-dástúrine saı qurmet kórsetildi. Bul – qazaqtyń qonaqjaılyǵy men ulttyq mádenıetiniń jarqyn kórinisi.
«Bolashaq oıyndary – 2026» týrnıri sport, tsıfrlyq tehnologııalar jáne halyqaralyq dostyqty toǵystyratyn aıtýly alańǵa aınalmaq.
Aıta keteıik, sondaı-aq búgin elordaǵa Birikken Arab Ámirlikteriniń sport mınıstri Ahmed Belhýl keldi.
Qurmetti meımandy Qazaqstan Respýblıkasy Týrızm jáne sport mınıstriniń orynbasary Baýyrjan Rapıkov qarsy alyp, aldaǵy halyqaralyq týrnır aıasyndaǵy is-sharalarǵa sáttilik tiledi.
Qazaqy qonaqjaılyq dástúrine saı áýejaıda BAÁ delegatsııasyna ulttyq taǵamdar usynylyp, qazaq halqynyń mádenıeti men salt-dástúri tanystyryldy.
Ahmed Belhýldyń sapary Qazaqstan men Birikken Arab Ámirlikteri arasyndaǵy sport salasyndaǵy yntymaqtastyqty nyǵaıtýǵa jáne fıdjıtal sportty damytý baǵytyndaǵy halyqaralyq áriptestikti keńeıtýge serpin beredi.
Aıta keteıik, «Bolashaq oıyndary – 2026» halyqaralyq týrnıriniń ashylý saltanatyna birqatar memleket basshylary qatysyp, Prezıdent Qasym-Jomart Toqaev sóz sóıleıtin bolady.
