«Bolashaq oıyndary – 2026» týrnırine 900-den astam sportshy qatysady
ASTANA. KAZINFORM – Erbol Myrzabosynov pen Qýanyshbek Esekeev «Bolashaq oıyndary» halyqaralyq mýltısporttyq týrnıriniń dırektsııasyna bardy.
«Bolashaq oıyndary — 2026» (GOTF 2026) halyqaralyq mýltısporttyq týrnırin uıymdastyrý jónindegi dırektsııada jarysty ótkizý tujyrymdamasynyń tanystyrylymy ótti. Іs-sharaǵa Týrızm jáne sport mınıstri Erbol Myrzabosynov pen Memleket basshysynyń kómekshisi, kıbersport federatsııasynyń prezıdenti Qýanyshbek Esekeev qatysty.
Jıynda bıyl 29 shilde men 9 tamyz aralyǵynda Qazaqstan astanasynda ótetin halyqaralyq týrnırge daıyndyqtyń negizgi baǵyttary tanystyryldy. Sondaı-aq jarysty ótkizý tujyrymdamasynyń egjeı-tegjeıli jospary, daıyndyqtyń jumys jospary, sporttyq jáne medıa ınfraqurylym, qaýipsizdik, IT-qamtamasyz etý, logıstıka jáne halyqaralyq yntymaqtastyq máseleleri qarastyryldy.
Ásirese klassıkalyq sport pen tsıfrlyq tehnologııalardy biriktiretin fıdjıtal-formatqa erekshe nazar aýdaryldy. «Bolashaq oıyndary — 2026» (GOTF 2026) aıasynda Astanada segiz dıstsıplına boıynsha jarystar ótkizý josparlanǵan. Olardyń qatarynda fıdjıtal-fýtbol, fıdjıtal-basketbol, MOBA PC, MOBA Mobile, koroldik shaıqas, fıdjıtal-shýter, fıdjıtal-bı jáne fıdjıtal jekpe-jek túrleri bar.
— Elimiz úshin mundaı týrnırdi ótkizý fıdjıtal baǵytty damytýdaǵy jáne Qazaqstannyń iri halyqaralyq jarystar ótetin alań retindegi bedelin nyǵaıtatyn mańyzdy qadam bolmaq. Búgingi tańda bizdiń aldymyzda sporttyq jáne IT-ınfraqurylymnan bastap qaýipsizdikke, logıstıkaǵa jáne halyqaralyq yntymaqtastyqqa deıingi barlyq baǵyt boıynsha joǵary deńgeıdegi uıymdastyrýdy qamtamasyz etý mindeti tur. Dırektsııanyń, memlekettik organdar men seriktesterdiń birlesken jumysy týrnırdi joǵary deńgeıde ótkizýge múmkindik beredi dep senemin, — dedi mınıstr.
Joba tanystyrylymy barysynda jarys ótetin nysandar da tanystyryldy. Olardyń qatarynda «Barys Arena», Jaqsylyq Úshkempirov atyndaǵy Jekpe-jek saraıy, Beeline Arena ulttyq tennıs ortalyǵy jáne Qazaqstan jeńil atletıkalyq sport kesheni bar.
Sonymen qatar basty medıaortalyqty uıymdastyrý, akkredıtatsııa júıesi, halyqaralyq habar taratý jáne qalalyq navıgatsııa sheshimderi de usynyldy. Týrnırge 50-den astam elden 900-den astam qatysýshy men komanda ókilderi qatysady dep josparlanǵan.
Aıta ketelik elordada Counter-Strike 2 boıynsha iri halyqaralyq týrnır – PGL Astana 2026 ótedi.
