Bolashaq oıyndary 2026: týrnırdiń júlde qory qansha
ASTANA. KAZINFORM – Bıyl 29 shilde men 9 tamyz aralyǵynda Astanada alǵash ret ótetin «Bolashaq oıyndary 2026» halyqaralyq mýltısporttyq týrnıriniń jalpy júlde qory demeýshilik qarajat esebinen 4 mln 650 myń AQSh dollar bolady. Bul týraly QR Týrızm jáne sport vıtse-mınıstri Serik Jarasbaev málim etti.
– Eń iri júlde qory Dota 2 jáne PUBG: Battlegrounds dıstsıplınalaryna qarastyrylǵan. Árqaısysyna 1 mln AQSh dollarynan bólinedi. Al Mobile Legends: Bang Bang boıynsha júlde qory 900 myń dollardy, fıdjıtal fýtbolda 625 myń dollardy, fıdjıtal jekpe-jekte 500 myń dollar. Qalǵan dıstsıplınalar boıynsha da tıisti júlde qorlary belgilengen, – dedi Serik Jarasbaev OKQ-da ótken brıfıngide.
Baspasóz máslıhatynda jýrnalıster «Bolashaq oıyndaryn» uıymdastyrýǵa jumsalatyn qarajat kólemi men qarjylandyrý kózderi týraly saýal qoıdy.
– «Bolashaq oıyndaryn» ótkizýge jalpy 24 mlrd teńge qarastyrylǵan. Onyń 45 paıyzy bıýdjet tarapynan. Naqtyraq aıtsaq, 10 mlrd teńgege jýyq qarastyryldy. Qalǵan 13-14 mlrd teńge demeýshilik qarajat esebinen qarjylandyrylady. Ol úshin arnaıy demeýshilik paketter ázirlendi. Demeýshiler sol paketter aıasynda óz qarajatyn quıyp jatyr. Sondaı-aq demeýshilik qarjynyń jartysyna jýyǵy halyqaralyq Phygital International uıymy tarapynan tartyldy. Osylaısha barlyq qarjy kózderin eseptegende jalpy soma 24 mlrd teńge, – dedi Serik Jarasbaev.
Onyń sózinshe, jarys baǵdarlamasyna 108 dıstsıplına engizilgen. Týrnır tórt sport nysanynda ótedi. Oǵan myńǵa jýyq sportshy qatysady. Delegatsııalar men resmı qonaqtardy qosa eseptegende, Qazaqstanǵa 2,5 myńǵa jýyq halyqaralyq qatysýshy keledi.
Buǵan deıin 29 shilde men 9 tamyz aralyǵynda Astanada kórermenderdi ne kútip turǵanyn jazǵanbyz.
