Bolashaq oıyndary – 2026: PUBG týrnırinde 17 Gaming chempıon atandy
ASTANA. KAZINFORM – Astanada ótip jatqan «Bolashaq oıyndary – 2026» aıasyndaǵy PUBG týrnıri máresine jetti. Úsh kúnge sozylǵan jarysta Qytaıdyń 17 Gaming komandasy chempıon atansa, Qazaqstannyń DIGA Esports ujymy 14-orynǵa turaqtady, dep habarlaıdy Kazinform agenttiginiń tilshisi.
Týrnırde álemniń eń myqty 16 komandasy 1 mıllıon AQSh dollary kólemindegi júlde qoryn sarapqa saldy. Chempıon sońǵy oıynnan keıin ǵana anyqtaldy.
Jarys qorytyndysynda 17 Gaming 131 upaı jınap, birinshi orynǵa ıe boldy. GAM The Expendables 120 upaımen kúmis júldeni enshilese, Team Vitality 106 upaımen úzdik úshtikti túıindedi.
Qazaqstandyq DIGA Esports 59 upaı jınap, týrnırdi 14-orynda aıaqtady.
Chempıon komanda 300 myń AQSh dollaryn ıelendi. Kúmis júldegerlerge 120 myń dollar, al qola júldegerlerge 100 myń dollar tabystaldy. Qazaqstandyq komandaǵa 15 myń AQSh dollary berildi.
Jarystan keıin 17 Gaming oıynshylary PUBG dıstsıplınasynyń tanymaldyǵy artyp kele jatqanyn aıtty.
-PUBG-diń bolashaǵy zor. Bıyl týrnırler sany kóbeıip keledi. Oıynǵa degen qyzyǵýshylyq ta artyp jatyr. Aldaǵy ýaqytta taǵy oralyp, jankúıerlerimiz úshin taǵy bir chempıondyq ataq jeńip alǵymyz keledi. Astana bizge óte unady. Munda kún ystyq bolǵanymen, taǵamdary óte dámdi eken, – dedi komanda músheleri.
Team Vitality oıynshysy Artem Baskakov úshinshi oıyn kúni eń qıyn kezeń bolǵanyn aıtty.
-Úshinshi kúni oıyn aımaqtarynyń ornalasýy bizge qolaısyz boldy. Soǵan qaramastan upaı jınaýǵa bar kúshimizdi saldyq jáne úzdik úshtikke endik. Óz stılimizden aınyǵan joqpyz: tıimdi sátterdi paıdalanyp, sabyr saqtap, komanda ishinde únemi baılanysta boldyq, – dedi ol.
Qazaqstandyq DIGA Esports úshin bul halyqaralyq deńgeıdegi alǵashqy iri týrnır boldy. Komanda segizinshi matchta jeńiske jetip, Beeline Arena trıbýnasyndaǵy jankúıerlerdiń zor qoshemetine bólendi.
Komanda oıynshysy Sanjar Qalıevtiń aıtýynsha, týrnır ujym úshin úlken tájirıbe boldy.
-Bul jarysqa álemniń eń úzdik 15 komandasy keldi. Sondyqtan báseke óte joǵary boldy. Soǵan qaramastan jaman nátıje kórsetken joqpyz dep oılaımyn. Osyndaı týrnırde óner kórsetý – biz úshin úlken mártebe. Jankúıerlerdiń qoldaýyn sezindik. Bul bizge erekshe kúsh berdi, – dedi ol.
Sanjar Qalıevtiń sózinshe, komanda týrnır barysynda qarsylastar deńgeıine beıimdele aldy.
-Alǵashqy kún beıimdelýge arnaldy. Ekinshi kúni oınaý jeńildeı tústi. Al úshinshi kúndi jaqsy ótkizdik dep esepteımin. Bizdiń quramda buǵan deıin Eýropadaǵy iri jarystarǵa da qatyspaǵan oıynshylar bar. Al munda álem chempıondaryna qarsy oınadyq. Sondyqtan osyndaı deńgeıdegi komandalar arasynda 14-oryn alý jaman nátıje emes, – dedi kıbersportshy.
Eske sala keteıik, «Bolashaq oıyndary – 2026» Astanada 29 shilde men 9 tamyz aralyǵynda ótedi. Jarys baǵdarlamasyna segiz dıstsıplına engizilgen. Jalpy júlde qory 4,65 mln AQSh dollaryn quraıdy.
