Bolashaq oıyndary – 2026: PUBG boıynsha Qazaqstan atynan jalǵyz komanda qatysady
ASTANA. KAZINFORM – Qazaqstannyń DIGA Esports komandasynyń PUBG oıynshysy Nurjan Qoıanaqov Astanada ótetin «Bolashaq oıyndary – 2026» halyqaralyq mýltısport týrnıri qarsańynda óz boljamdaryn aıtty.
Komanda PUBG dıstsıplınasy boıynsha synǵa túsedi. Jarystar 31 shilde men 2 tamyz aralyǵynda Beeline Arena ulttyq tennıs ortalyǵynda ótedi. Qazaqstandyq kıbersportshylar halyqaralyq arenada el namysyn laıyqty qorǵaýdy kózdep otyr.
– Biz Diga Esports ataýymen óner kórsetemiz jáne jaqsy nátıje kórsetemiz dep úmittenemiz. Sebebi biz – irikteýden ótken jalǵyz qazaqstandyq komandamyz. PUBG boıynsha elimizdiń namysyn qorǵaımyz, – dedi Nurjan Qoıanaqov týrnır kýlýarynda.
Onyń aıtýynsha, DIGA Esports quramynda tórt oıynshy bar. Komanda osyndaı aýqymdy jarysqa alǵash ret qatysyp otyr.
– Týrnırge qatysatyn barlyq komanda – óz elderiniń úzdikteri. Degenmen óz múmkindigimizdi joǵary baǵalaımyz. Laıyqty nátıje kórsetýge bar kúshimizdi salamyz jáne jaqsy nátıjeden úmittimiz, – dedi komanda múshesi.
N. Qoıanaqovtyń sózinshe, irikteýden keıin birden týrnırge daıyndyq bastalyp, shamamen eki aıǵa sozylǵan. Osy ýaqyt aralyǵynda komanda kún saıyn jattyǵyp, oıyn taktıkasyn jetildirýge basa nazar aýdarǵan.
Oıynshy jarys aldynda tolqý bar ekenin jasyrmady. Degenmen komanda jattyqtyrýshysy psıhologııalyq turǵydan daıyndalýǵa kómektesip jatyr.
– Árıne, tolqý bar. Óıtkeni buǵan deıin mundaı deńgeıdegi týrnırde oınaǵan emespiz. Biraq bári jaqsy bolady dep senemiz jáne laıyqty nátıje kórsetemiz dep oılaımyn, – dep túıindedi Nurjan Qoıanaqov.
Eske sala keteıik, «Bolashaq oıyndary – 2026» týrnıri Astanada 29 shilde men 9 tamyz aralyǵynda ótedi. Jarysqa 34 elden 800-den astam sportshy qatysady.
Týrnırdiń jalpy júlde qory 4 mln 650 myń AQSh dollaryn quraıdy.
Aıta keteıik, Prezıdent Teleradıokesheni «Bolashaq oıyndary–2026» týrnıriniń televızııalyq túsirilimin jasaıdy.
Byltyr BAÁ Ábý-Dabı qalasynda Astana Bolashaq oıyndarynyń estafetasyn qabyldaǵan edi.
