«Bolashaq oıyndary 2026»: Kıbersporttyń álemdik juldyzdary Astanaǵa kelip jatyr
ASTANA. KAZINFORM — Astana «Bolashaq oıyndary 2026» (GOTF 2026) powered by Samruk-Kazyna halyqaralyq týrnıriniń qatysýshylaryn qarsy ala bastady. Elordaǵa álemdegi jetekshi fıdjıtal jáne kıbersport komandalary kelýde. Olardyń qatarynda iri halyqaralyq jarystardyń jeńimpazdary men júldegerleri bar.
Aldaǵy kúnderi Astana 50-den astam ulttyń 800-den asa sportshysyn biriktirip, dástúrli sport túrleri, kompıýterlik oıyndar men zamanaýı tehnologııalar toǵysatyn álemdik fıdjıtal sporttyń basty alańdarynyń birine aınalady.
Elordaǵa alǵashqylardyń biri bolyp Phygital Basketball Presented by Halyk Fund dıstsıplınasynyń qatysýshylary keldi. Olardyń qatarynda MINSK, Zagrebacki malisani NITUI, Vozdovac Belgrad, Dangerous Meridianbet, Flow Game Basketball jáne Latyn Amerıkasyndaǵy eń tanymal sport klýbtarynyń biri sanalatyn Boca Juniors komandalary bar. Klýbtyń basketbol bólimi Argentınanyń qazirgi eki dúrkin chempıony ári Basketball Champions League Americas týrnıriniń jeńimpazy bolyp tabylady. Al klýbtyń fıdjıtal komandasy «Bolashaq oıyndary 2026» týrnırine ulttyq irikteýde jeńiske jetý arqyly joldama aldy.
Fıdjıtal-basketbol komandalarynan keıin elorda týrnırdiń ózge de dıstsıplınalarynyń qatysýshylaryn qabyldaýǵa daıyndalýda. Astanaǵa keletin eń tanymal ujymdardyń qatarynda Xtreme Gaming, Vici Gaming, Team Falcons, Team Spirit, T1, Bigetron by Vitality, Twisted Minds, 17 Gaming, Aurora Gaming jáne The MongolZ bar. Olar MOBA PC Dota 2 Presented by Bank CenterCredit, MOBA Mobile MLBB Presented by FREEDOM, Battle Royale – PUBG: BATTLEGROUNDS Presented by Alatau City Bank, Phygital Shooter CS 2 Presented by Yandex GO jáne týrnır baǵdarlamasyndaǵy basqa da dıstsıplınalarda baq synaıdy.
Sport nysandarynda sońǵy daıyndyq jumystary aıaqtalýǵa jaqyn. Týrnır barysynda tsıfrlyq matchtar men dástúrli jarystardy qatysýshylar men kórermenderge arnalǵan ınteraktıvti aımaqtar men zamanaýı tehnologııalyq sheshimder tolyqtyrady.
Komandalardyń kelýi týrnırdiń negizgi oqıǵalarynyń bastalǵanyn bildiredi. Fıdjıtal jáne kıbersport jankúıerleri buǵan deıin halyqaralyq translıatsııalar arqyly ǵana tamashalaǵan áıgili oıynshylar men komandalardyń ónerin endi Astanada tikeleı kóre alady.
«Bolashaq oıyndary 2026» týrnıri 29 shilde men 9 tamyz aralyǵynda Astanada ótedi. Baǵdarlama fızıkalyq jáne tsıfrlyq formattardy biriktiretin segiz dıstsıplınadan turady.
Aıta ketelik Astanadaǵy «Bolashaq oıyndaryna» 800 erikti qatysady.
