«Bolashaq oıyndary – 2026»: qazaqstandyq Novaq qola júldeden qaǵyldy
ASTANA. KAZINFORM – Elordada ótip jatqan halyqaralyq «Bolashaq oıyndary – 2026» jarystary sheshýshi kezeńge jaqyndap keledi. Búgin fıdjıtal jekpe-jek, fýtbol, kıbersport jáne shýter dıstsıplınalary boıynsha fınalıster men júldegerler anyqtalyp jatyr.
Búgin Phygital Fighting dıstsıplınasy boıynsha jarystar jalǵasyp jatyr. Sportshylar aldymen konsoldik oıynda kúsh synasyp, keıin aralas jekpe-jek alańynda kezdesedi. Vırtýaldy kezeńdegi nátıje olardyń negizgi jekpe-jek aldyndaǵy bastapqy artyqshylyǵyn aıqyndaıdy.
Alǵashqy jekpe-jekte Reseıdiń Ekaterınbýrg qalasynan kelgen «Arhangel Mıhaıl» klýbynyń ókili Maksım Fýks aıqyn basymdyqpen jeńiske jetti. Jarystyń vırtýaldy kezeńinde 3:0 esebimen ozyp, shynaıy aıqasta merziminen buryn jeńiske jetti.
– Djoıstıkte maǵan teń keletin qarsylas bolǵan joq. Vırtýaldy kezeńdegi jeńisim ózime senimdilikti arttyrdy. Degenmen oıyn – bir bólek, jekpe-jek – bir bólek. Sondyqtan ár kezeńge jeke daıyndalý qajet. Jarysty uıymdastyrý jumystary óte joǵary deńgeıde ótti. Astana – óte ádemi qala. Qalany aralap kórdim, bári unady. Raqmet, – dedi Maksım Fýks.
Qazaqstan atynan fıdjıtal jekpe-jekke FUTURE NOMADS komandasy (Nurjigit Baımen, Rasýl Hataev, Bogdan Pshebelskıı) qatysady. Qazaqstandyq sportshylar jarysy saǵat 21:15-te bastalady.
Aıta keteıik, Jaqsylyq Úshkempirov atyndaǵy Jekpe-jek saraıynda MOBA Mobile MLBB dıstsıplınasy boıynsha jartylaı fınaldyq kezdesýler ótti. Komandalar fınal joldamasyn sarapqa saldy. Munda ındonezııalyq Onic toby malaızııalyq Selangor Red Giants komanadsynan basym tústi. Esep: 2:0. Al saǵat 19.00-de serbııalyq Aurora Gaming ındonezııalyq Bigerton by Vitality komandasymen kezdesedi.
Sondaı-aq Phygital Football UFL týrnıriniń jartylaı fınaldary ótti. Qatysýshylar aldymen fýtbol sımýlıatorynda baq synap, keıin básekeni 5×5 formatyndaǵy shaǵyn fýtbol alańynda jalǵastyrady. Jeńimpaz eki kezeńniń qorytyndy kórsetkishi boıynsha anyqtalady.
Bul baǵytta meksıkalyq Quetzales-Armadillos komandasy Gvatemaladan kelgen Club Holcattes tobyn 2:0 esebimen jeńdi. Al ýrýgvaılyq NS Team ózbekstandyq FC Olympic Phygital komandasynan 2:0 esebimen basym tústi.
Phygital Shooter CS2 saıysynda da alǵashqy júldeger belgili bola bastady. Búgin úshinshi oryn úshin match pen fınal ótip, qatysýshylar áýeli kompıýterlik oıynda, keıin lazertag alańynda sheberligin synaıdy. Ókinishke qaraı Minsk House toby 2:0 esebimen qazaqstandyq Novaq komandasynan ozdy. Al saǵat 19:00-de Team KZ reseılik Liga Pro Team tobymen baq synasady.
Eske sala ketsek, Astanada eń iri halyqaralyq sporttyq týrnırlerdiń biri — «Bolashaq oıyndary - 2026» saıysy ótip jatyr. 12 kún boıy qatysýshylar fıdjıtal-fýtbol, basketbol, hokkeı, jekpe-jek, boks, bı baǵyttary, shýterler, Battle Royale, MOBA, dron jarysy, Battle Bots jáne jańa formattaǵy ózge de sport túrlerinen baq synaıdy.
Buǵan deıin Astanadaǵy týrnırdiń qaralymy 85 mln-ǵa jetkenin jazǵan edik.
