«Bolashaq oıyndary-2026»: Qazaqstanda halyqaralyq týrnır ótedi
ASTANA. KAZINFORM – Endigi jyly Astanada phygital formatyndaǵy «Bolashaq oıyndary – 2026» mýltısporttyq týrnıri ótedi. Halyqaralyq básekege 100-den astam elden 1,5 myńǵa jýyq sportshy qatysady dep josparlanǵan. Bul týraly «Ortalyq kommýnıkatsııalar qyzmeti» RMM baspasóz jıynynda QR Týrızm jáne sport vıtse-mınıstri Serik Jarasbaev málimdedi.
– Jarys 18 shilde men 1 tamyz aralyǵynda ótedi. Týrnır eki apta boıy 13 dıstsıplına boıynsha uıymdastyrylady. Sportshylar phygital formatynda fýtbol, faıtıng, basketbol, densıng, hokkeı, shýter, batl, MOB 1, MOB 2 jáne dron reısıng sport túrlerinen baq synaıdy. Týrnırde usynylatyn barlyq dıstsıplına sport, tehnıka, batl sanattaryna bólinedi, – deıdi vıtse-mınıstr.
Phygital International uıymynyń bas dırektory bul týrnırdiń ereksheligin túsindirdi.
– 2026 jyly «Bolashaq oıyndary» is-sharasyn ótkizýge laıyqty qalany tańdaý úshin kóptegen el arasynda óte muqııat irikteý júrgizdik. Shynynda, uıymdastyrýshy qala ataný úshin aıtarlyqtaı kúsh salý kerek boldy jáne sońynda Qazaqstan irikteýden jeńip shyqty. Men Phygital International uıymynyń atynan Qazaqstan Prezıdenti men Týrızm jáne sport mınıstrligine osy is-sharany uıymdastyrýǵa múmkindik bergeni úshin alǵysymdy bildirgim keledi. Bul – fızıkalyq jáne tsıfrlyq sport túrlerin biriktirip, jańa tájirıbeler týdyratyn baǵyt. Biz dástúrli sport túrlerin beıne oıyndarmen biriktiremiz. ıAǵnı, olar shynaıy ómirmen qosa, vırtýaldy da tájirıbe jınaı alady. 2026 jyly «Bolashaq oıyndary» búkil álemniń nazaryn ózine aýdarady. Biz búkil álemdik uıymdardy biriktiremiz. «Bolashaq oıyndary» is-sharasynda buryn-sońdy eshqandaı jarystarda bolmaǵan joǵarǵy deńgeıdegi jańa tehnologııalar qoldanylady. Biz sportshylardyń júrek qaǵysyn oıyn barysynda tikeleı baqylaı alamyz. Uıymdastyrý barysynda qoldanatyn ınstrýmentterimiz eshteńemen salystyrýǵa kelmeıdi. Sizder muny ýaqyty kelgende kóresizder, – deıdi Nıs Hatt.
Al vıtse-mınıstr halyqaralyq týrnırdi ótkizýge qajetti qarajatty qaıdan alatyndaryn aıtty.
– Bul týrnırdi uıymdastyrýǵa qajetti qarajatty jaýapty mınıstrlik anyqtap jatyr. Biraq qarjylyq shyǵynǵa halyqaralyq, aýqymdy sharaǵa qatysqysy keletin demeýshiler, ınvestorlar men kommertsııalyq uıymdar da atsalysatynyn atap ótkim keledi. Jarysqa shetelden keletin týrısterdiń kóp bolýy sheteldik ınvestorlar men demeýshilerdi tartýǵa kómektesedi. Jalpy shyǵyndy aıtý úshin aldymen respýblıkalyq bıýdjetten qansha aqsha bólinetinin, qansha qarajat demeýshiler tarapynan óteletinin jáne sharany uıymdastyrýshy uıymnyń bıýdjetinen qansha qarjy beriletinin anyqtaýymyz kerek, – deıdi Serik Jarasbaev.
Astanada ótetin jarysty kórermen de tamashalaı alady. Ázirge bılet qunynyń qansha bolatyny belgisiz.
– Oıyndardy tamashalaý úshin kórermenge bılet satylady. Biz bul jarys aıasynda kóptegen týrıst keledi degen úmittemiz. Biraq qazir bılet baǵasynyń qansha teńge bolatyny belgisiz. Aldymen ár nysandaǵy otyrý oryndaryn belgilep, sporttyń túrine qaraı ǵımarattyń múmkindikterin qarastyrý kerek. Sodan keıin ǵana bıletterdiń sany men baǵasy belgili bolady, – deıdi Sport jáne týrızm mınıstrliginiń ókili.
Jarys júldegerlerine 10 mln AQSh dollary kóleminde syıaqy beriledi.
– «Bolashaq oıyndary – 2026» halyqaralyq týrnıriniń jalpy júlde qory – 10 mln AQSh dollary. Bul 13 sport túrine bólinedi. Biraq keı sport túrleriniń júlde qory kóp, keıbireýiniki az bolady. Júldegerlerge beriletin syıaqy demeýshilerdiń kómegimen óteledi. Biz qazir demeýshilerdi tartý boıynsha qarqyndy jumys atqaryp jatyrmyz. Qazir ózderi qyzyǵýshylyq tanytyp, kelip jatqan kompanııalar da bar. Osy múmkindikti paıdalanyp, «Bolashaq oıyndary – 2026» is-sharasyn ótkizý úshin senimdi seriktesterdi izdestirip jatqanymyzdy aıtqym keledi. Bul týrnırdiń áleýeti óte úlken, – deıdi «KazSportInvest» AQ prezıdenti Alıbek Hasenov.
Aıta keteıik, 19-27 shilde aralyǵynda Qyrǵyzstanda alǵash ret halyqaralyq Gallops at jarysy ótpek.