Bolashaq oıyndary 2026: Qazaqstan quramasy qaı dıstsıplınalardan júldege úmitti
ASTANA. KAZINFORM – «Bolashaq oıyndary 2026» halyqaralyq týrnırine álemniń jetekshi sport jáne kıbersport klýbtary qatysady. Bul týraly Ortalyq kommýnıkatsııalar qyzmetinde ótken baspasóz máslıhatynda QR Týrızm jáne sport vıtse-mınıstri Serik Jarasbaev málim etti.
– Týrnırge Team Spirit, T1, Team Falcons, Xtreme Gaming, Vici Gaming, Boca Juniors, Valencia Basket, LGD.Pinghu, Twisted Minds, Bigetron by Vitality jáne álemdik sport pen kıbersport sahnasynda keńinen tanylǵan ózge de komandalar qatysady. Biz úshin Qazaqstan ókilderiniń óner kórsetýi de erekshe mańyzdy. Elimizdiń namysyn 11 komanda men jekelegen sportshylar qorǵaıdy, – dedi vıtse-mınıstr.
Onyń aıtýynsha, fıdjıtal fýtbolda Qazaqstan atynan ACF x Allur jáne UEL Team, fıdjıtal basketbolda PBC Astana men GTB KZ, al fıdjıtal jekpe-jekte Future Nomads komandasy synǵa túsedi.
Rune Eaters komandasy Mobile Legends: Bang Bang jáne Dota 2 boıynsha eki dıstsıplınada baq synaıdy. DIGA Esports PUBG: Battlegrounds, al NOVAQ pen TeamKZ Counter-Strike 2 jarystaryna qatysady. Fıdjıtal bı dıstsıplınasynda Qazaqstan atynan Gúlnaz Amanǵalı óner kórsetedi.
Vıtse-mınıstr qazaqstandyq qatysýshylardyń bir bóligi týrnırge ashyq irikteý kezeńi arqyly joldama alǵanyn atap ótti. Onyń sózinshe, bul otandyq sportshylar men kıbersportshylarǵa álemniń úzdik komandalarymen bir alańda kúsh synasýǵa múmkindik beredi.
Óz kezeginde «Qazsportınvest» AQ prezıdenti Álibek Hasenov Qazaqstan quramasynyń júldeli oryndarǵa talasýǵa áleýeti bar ekenin aıtty.
– Biz Qazaqstandaǵy fıdjıtal sporttyń damý tarıhynda jańa kezeńdi bastap otyrmyz. Buǵan deıin ótken «Bolashaq oıyndarynda» qazaqstandyq komandalar joǵary nátıjeler kórsetti. Máselen, fıdjıtal-shýter dıstsıplınasynda eki ret qatarynan chempıon atandy. Bıyl da osy jetistikti qaıtalaýǵa úmittimiz. Ásirese Counter-Strike 2 dıstsıplınasynan jaqsy nátıje kútemiz, – dedi Álibek Hasenov jýrnalıster suraǵyna.
Onyń aıtýynsha, jýyrda Qazaqstanda ótken halyqaralyq Phygital Contenders týrnıri uıymdastyrýshylar úshin mańyzdy synaq alańy boldy.
– Bul jarys barysynda týrnırdi uıymdastyrýdyń barlyq baǵyttary pysyqtaldy. Fıdjıtal fýtbol boıynsha 16-dan astam komanda qatysty. Olardyń qatarynda Brazılııa, Argentına jáne Ispanııadan kelgen myqty ujymdar boldy. Osyndaı básekede bizdiń komanda birinshi oryn ıelendi. Qazaqstan atynan óner kórsetetin komandalardyń biri – ACF x Allur. Olar halyqaralyq qarsylastaryna óz deńgeıin dáleldeı aldy, – dedi ol.
Álibek Hasenovtiń aıtýynsha, atalǵan komanda Abý-Dabıde ótken aldyńǵy oıyndarda tsıfrlyq kezeńde barlyq qarsylasyn iri eseppen jeńgenimen, jalpy esepte júldegerler qataryna ene almaǵan.
– Osy tájirıbeden keıin komanda óz oıynyna jan-jaqty taldaý jasap, ásirese fızıkalyq daıyndyqty kúsheıtti. Al ACF klýby Phygital Contenders týrnıriniń jeńimpazy atanyp, tsıfrlyq kezeńde barlyq qarsylasyn 12:0 esebimen utty. Sondyqtan bul komandadan da úlken úmit kútemiz, – dedi ol.
Sonymen qatar Astana komandasy buǵan deıingi «Bolashaq oıyndarynda» fıdjıtal basketboldan qola júldege ıe bolǵan.
– Biz komandamen turaqty baılanystamyz. Olar daıyndyqtaryn jalǵastyryp jatyr. Buǵan deıin álsizdeý bolǵan tsıfrlyq kezeńge erekshe kóńil bólip, osy baǵytta aýqymdy jumys atqardy. Sondyqtan olardyń da júldeli oryndardyń birine talasýǵa múmkindigi bar dep esepteımiz, – dedi «Qazsportınvest» AQ prezıdenti.
Ol qalǵan dıstsıplınalarda básekeniń óte joǵary bolatynyn aıtty.
– Bul jarystarǵa álemniń eń úzdik komandalary keledi. Sondyqtan olarmen teń dárejede básekelesý ońaı bolmaıdy. Degenmen sportta árdaıym kútpegen nátıje bolýy múmkin. Týrnırdiń óz elimizde ótýi, jankúıerlerdiń qoldaýy qazaqstandyq komandalarǵa qosymsha serpin beredi dep senemiz. Eń basty maqsat – fınaldyq kezeńge joldama alyp, júldeli oryndar úshin kúresý, – dedi Álibek Hasenov.
Buǵan deıin atalǵan týrnırde júlde qory qansha ekenin jazǵanbyz.
