«Bolashaq oıyndary — 2026»: Astanadaǵy týrnırge 50-den asa elden adam keledi
ASTANA. KAZINFORM — Astana 29 shilde men 9 tamyz aralyǵynda álemdik fıdjıtal sporttyń ortalyǵyna aınalady. El astanasy dástúrli sport pen kıbersportty ushtastyratyn halyqaralyq mýltısporttyq «Bolashaq oıyndary — 2026» týrnırin qabyldaıdy.
Týrızm jáne sport mınıstrligi habarlaǵandaı, 12 kún boıy álemniń 50 elinen kelgen 800-den astam sportshy men klýb 8 dıstsıplına boıynsha jalpy júlde qory 4,75 mıllıon AQSh dollaryn quraıtyn báıgede baq synaıdy.
Qazaqstan atynan óz alańynda ótetin týrnırge ulttyq irikteýden ótken 11 komanda qatysady. Olar álemdik sport pen kıbersporttyń áıgili alyptarymen, atap aıtqanda Team Spirit, T1, Team Falcons, Boca Juniors, Valencia Basket, LGD.Pinghu jáne ózge de ańyzǵa aınalǵan klýbtarmen kezdesedi.
Bul dıstsıplınada el namysyn DIGA Esports qorǵaıdy. DIGA Esports — Qazaqstandaǵy PUBG baǵyty boıynsha jetekshi uıymdardyń biri. Komanda turaqty túrde PUBG EMEA Masters, PUBG EMEA Championship Qualifiers sııaqty Eýropadaǵy eń iri týrnırlerge, sondaı-aq halyqaralyq eýropalyq lıgalarǵa qatysyp keledi.
Qazaqstan atynan osynaý saıysta birden eki komanda shyǵady: NOVAQ jáne Team KZ.
NOVAQ komandasynyń negizin álemge áıgili Counter-Strike oıynshysy, Major týrnıriniń eki dúrkin chempıony Dáýren «AdreN» Qystaýbaev qalaǵan. Komanda quramynda halyqaralyq deńgeıde tanylǵan Mıhaıl «Dosia» Stolıarov, Rústem «mou» Telepov jáne Sanjar «neaLaN» Ishakov syndy tájirıbeli oıynshylar óner kórsetedi.
Al Team KZ quramyna kásibı arenada ózderin tanyta bastaǵan qazaqstandyq jas oıynshylar engen.
Bul dıstsıplınada Qazaqstan atynan Rune Eaters komandasy synǵa túsedi. Onyń quramynda The International, Riyadh Masters týrnırlerine qatysqan, sondaı-aq Na’Vi, Team Spirit, PSG.Quest jáne basqa da tanymal uıymdar sapynda óner kórsetken tájirıbeli oıynshylar bar. Quram Qazaqstandaǵy eń básekege qabiletti ujymdardyń biri sanalady.
MOBA Mobile baǵyty boıynsha da el namysyn Rune Eaters qorǵaıdy. Komanda IESF, Qazaqstan Respýblıkasy Kýbogy jáne Alaman League sııaqty halyqaralyq ári respýblıkalyq týrnırlerdiń jeńimpazy atanǵan.
Fıdjıtal basketbol dıstsıplınasynda Qazaqstandy eki komanda tanystyrady: PBC Astana jáne GTB KZ. PBC Astana elimizdegi eń ataqty ári eń kóp júlde ıelengen basketbol klýby. Sonymen qatar ol «Bolashaq oıyndary — 2025» týrnıriniń qola júldegeri.
Al GTB KZ quramyna qazaqstandyq klassıkalyq jáne 3×3 basketbolynyń tájirıbeli oıynshylary biriktirilgen.
Fıdjıtal fýtbolda Qazaqstandy ACF x Allur jáne UEL Team komandalary tanystyrady. Eki ujym da ulttyq irikteýden sátti ótip, óz alańynda ótetin týrnırge joldama aldy. Olar álemniń eń myqty fıdjıtal klýbtarymen kúsh synasady.
Phygital Fighting dıstsıplınasynda Qazaqstan namysyn Future Nomads komandasy qorǵaıdy. Komanda quramynda MMA-dan álem jáne Azııa chempıondary, Qazaqstan chempıondary jáne kásibı promoýshenderdiń qazirgi kóshbasshylary bar.
Fıdjıtal bı saıysynda Qazaqstan atynan ulttyq irikteýdiń jeńimpazy Gúlnaz Amanǵalı óner kórsetedi.
«Bolashaq oıyndary — 2026» Astananyń tórt zamanaýı sport nysanynda ótedi:
• Qazaqstan jeńil atletıka sport kesheni;
• Jaqsylyq Úshkempirov atyndaǵy Jekpe-jek saraıy;
• Beeline Arena Ulttyq tennıs ortalyǵy;
• «Barys Arena» muz saraıy.
Jarys baǵdarlamasyna tsıfrlyq jáne fızıkalyq kezeńderdi biriktiretin segiz dıstsıplına engizilgen. Bul format «Bolashaq oıyndaryn» qazirgi zamanǵy eń ınnovatsııalyq halyqaralyq sport jobalarynyń birine aınaldyrady.
Óz alańynda ótetin bul týrnır qazaqstandyq sportshylar men kıbersportshylar úshin álemniń úzdik klýbtaryna qarsy sheberligin synaýǵa tamasha múmkindik bolsa, jankúıerler úshin tehnologııa men dene daıyndyǵy úılesken jańa býyn sportyn óz kózderimen tamashalaýǵa jol ashady.
Osyǵan deıin Oljas Bektenov «Bolashaq oıyndary-2026» týrnırine daıyndyqty teksergenin jazǵanbyz.
