«Bolashaq oıyndary — 2026»: Astanadaǵy týrnırdiń qaralymy 85 mln-ǵa jetti
ASTANA. KAZINFORM — Astanada ótip jatqan halyqaralyq mýltısporttyq «Bolashaq oıyndary — 2026» týrnıri kórermen qyzyǵýshylyǵy boıynsha joba tarıhyndaǵy eń joǵary kórsetkishke jaqyndap keledi. Bul týraly Týrızm jáne sport mınıstrliginiń baspasóz qyzmeti habarlady.
Jarystyń alǵashqy tórt kúniniń ózinde translıatsııalar 85 mıllıonnan astam qaralymǵa qol jetkizdi. Qazirgi qarqyn saqtalsa, týrnır aıaqtalǵanǵa deıingi jalpy aýdıtorııa kólemi 430-490 mıllıon qaralymǵa jetýi múmkin.
Mundaı nátıjege halyqaralyq medıaseriktester jelisiniń aıtarlyqtaı keńeıýi yqpal etip otyr. Máselen, bıyl týrnırdiń medıaseriktesteri sany 27-den 54-ke, al jarysty kórsetetin strımerlerdiń sany 58-den 120-ǵa deıin artty. Sonymen qatar translıatsııalar 16-dan astam tilde júrgizilip jatyr.
Týrnır kontenti Qytaı, TMD elderi, Latyn Amerıkasy, Úndistan jáne álemniń ózge de óńirlerindegi jetekshi televızııalyq jáne tsıfrlyq platformalar arqyly taratylyp jatyr. Negizgi seriktester qatarynda HUYA, BIGG TV, Play TV, XP Esports, VK, bilibili, Rutube jáne Douyu platformalary bar.
Kórermen aýdıtorııasynyń artýyna tsıfrlyq platformalar da aıtarlyqtaı yqpal etip otyr. Aldyńǵy týrnırde barlyq qaralymnyń shamamen 82 paıyzy strımıngtik servısterge tıesili bolsa, bıyl bul kórsetkishtiń odan ári ósip kele jatqany baıqalady. Bul fıdjıtal-formattyń jastar men tehnologııalyq aýdıtorııa arasynda joǵary suranysqa ıe ekenin kórsetedi.
Týrnırdiń eń joǵary kórermen kórsetkishteri aldaǵy fınaldyq jarystar kezinde kútilýde. 5 tamyzda Dota 2 týrnıriniń fınaly ótse, 8-9 tamyzda Counter-Strike 2, Mobile Legends: Bang Bang jáne fıdjıtal-fýtbol jarystarynyń jeńimpazdary anyqtalady. Sarapshylar dál osy básekeler jalpy aýdıtorııa ósiminiń negizgi draıverine aınalady dep boljap otyr.
«Bolashaq oıyndary — 2026» týrnıriniń Astanada uıymdastyrylýy Qazaqstannyń halyqaralyq deńgeıdegi sporttyq ári tehnologııalyq is-sharalardy joǵary deńgeıde ótkize alatyn el ekenin taǵy bir márte dáleldep otyr. Mıllıondaǵan sheteldik kórermendi qamtyǵan translıatsııalar Qazaqstannyń halyqaralyq deńgeıdegi tanymaldylyǵyn arttyryp, elimizdiń jahandyq fıdjıtal ındýstrııasyndaǵy pozıtsııasyn nyǵaıtýǵa yqpal etip jatyr.
Eske sala keteıik, «Bolashaq oıyndary» — dástúrli sport pen tsıfrlyq tehnologııalardy ushtastyratyn halyqaralyq mýltısporttyq týrnır. Bıylǵy jarys 29 shilde men 9 tamyz aralyǵynda Astana qalasynda ótip jatyr.
