Bolashaq órt sóndirýshiler Kókshetaý kóshelerin dezınfektsııalap júr

KÓKShETAÝ. QazAqparat – Koronavırýs ınfektsııasynyń taralý qaýpine baılanysty engizilgen tótenshe jaǵdaı jáne karantın kezinde Kókshetaý tehnıkalyq ınstıtýtynyń jeke quramynan qurylǵan arnaıy jasaq Kókshetaý qalasynyń kóshelerin dezınfektsııalaýǵa kiristi. Bul týraly qala ákiminiń Instagram paraqshasynda jarııalandy, dep habarlaıdy QazAqparat tilshisi

«Jasaqta 20 adam bar. Oblys ortalyǵy ákimdiginiń qoldaýymen otrıadtyń qorǵanys kıimi, qorǵanys quraldary, aýmaqty dezınfektsııalaıtyn arnaıy qondyrǵylary bar. Jasaq karantın merziminiń sońyna deıin jumys isteıdi», - deıdi Kókshetaý tehnıkalyq ınstıtýtynyń basshysy Syrym Sháriphanov.

Aıta keteıik, búgingi tańda Aqmola oblysy boıynsha barlyǵy 50 blokbeket ornalasqan. Onyń ishinde 12 blokbeket Kókshetaý qalasyna kirip-shyǵatyn joldarda.

Naqtyraq alsaq, «Kókshetaý - Rýzaevka», «Kókshetaý - Omby» joly, aınalma joldaǵy Esil janar-jaǵar maı quıý stansasynyń mańy, Qarasaı shossesiniń 7-shaqyrymy, Sımferopol kenti KTI polıgony, Krasnoıar aýylynan shyǵa beriste, «Nur-Sultan-Kókshetaý», «Kókshetaý-Zerendi» tasjoly, Qyzyl juldyz aýylynan shyǵaberis tárizdi baǵyttarda blokbeketter ornalasqan.