Bolashaq ofıtserler áskerı bólimderde taǵylymdamadan ótti
ASTANA.KAZINFORM — Saǵadat Nurmaǵambetov atyndaǵy Qurlyq áskerleri áskerı ınstıtýtyn aıaqtaýshy túlekter Qarýly kúshterdiń áskerı bólimderindegi taǵylymdamalaryn sátti aıaqtady.
Bolashaq ofıtserlerdiń praktıkalyq daıyndyǵy elimizdiń ártúrli óńirlerindegi garnızondarda júzege asty.
«Ońtústik» óńirlik qolbasshylyǵynyń Taraz garnızonynda kýrsanttar 5-shi mehanıkalandyrylǵan brıgada men jóndeý-qalpyna keltirý áskerı bóliminiń bazasynda tájirıbeden ótti. Olar tájirıbeli ofıtserlerdiń jetekshiligimen bólimshelerdegi qyzmettiń uıymdastyrylýymen, jaýyngerlik daıyndyqtyń erekshelikterimen, sondaı-aq tehnıkalyq jáne tyldyq qamtamasyz etý bólimderiniń jumysymen jaqynyraq tanysty.
Bolashaq ofıtserlerdiń áskerı joǵary oqý ornyn bitirgen soń atqaratyn alǵashqy laýazymy — vzvod komandıri mindetterin oryndaýǵa daıarlaýǵa erekshe nazar aýdaryldy. Taǵylymdama barysynda kýrsanttar sabaqty josparlaýǵa qatysyp, jeke quramdy basqarý máseleleri men bólimshelerdiń kúndelikti qyzmetin uıymdastyrý tártibin jan-jaqty zerdeledi.
Tehnıkalyq qamtamasyz etý fakýltetiniń kýrsanty Madııar Moldahmet bul taǵylymdama bolashaq ofıtserlerge áskerdegi qyzmetti barynsha jaqynnan kórýge múmkindik bergenin aıtady.
— Men úshin áskerı taǵylymdama óte paıdaly boldy. Vzvod komandıri bolýdyń jaýapkershiligin túsindim. Bul tek teorııa ǵana emes, sonymen qatar kúndelikti tájirıbe. Biz bólimshede qyzmettiń qalaı uıymdastyrylatynyn, jeke qurammen jumystyń qalaı júrgiziletinin jáne jas ofıtserdiń qandaı mindetterdi atqaratynyn kórdik, — dedi kýrsant.
Aldaǵy aılarda ınstıtýt túlekteri alǵashqy ofıtserlik áskerı ataqtaryn alyp, Qazaqstan Qarýly kúshteriniń ofıtserlik quramyn tolyqtyrady. Áskerdegi taǵylymdama barysynda jınaqtalǵan tájirıbe olardyń aldaǵy áskerı qyzmetiniń berik negizine aınalmaq.
Aıta ketelik Ulttyq qorǵanys ýnıversıtetinde halyqaralyq gýmanıtarlyq quqyq boıynsha jańa pán engiziletini týraly jazǵan edik.
