Bolashaq muǵalimderdi daıarlaýdyń jańa ulttyq modeli tanystyryldy
ASTANA. KAZINFORM — Usynylyp otyrǵan modeldiń negizinde muǵalimdi daıarlaýdyń dástúrli tásilinen pedagogtiń biryńǵaı kásibı ómirlik tsıkline kóshý jatyr.
Astanada bilim berý qyzmetkerleriniń jyl saıynǵy tamyz konferentsııasy aıasynda Qazaqstan Respýblıkasy Ǵylym jáne joǵary bilim mınıstrliginiń uıymdastyrýymen «Bolashaqtyń pedagogıkalyq bilimi: ulttyq modeldi damytý jáne engizý» sektsııasy ótti. Іs-shara pedagogıkalyq bilim berýdi damytýdyń negizgi baǵyttaryn jáne pedagogterdi daıarlaý men olardyń kásibı qalyptasýynyń biryńǵaı ulttyq modelin qalyptastyrý máselelerin talqylaýǵa arnalǵan alańǵa aınaldy.
Respýblıkalyq tamyz konferentsııasy Qazaqstan Respýblıkasynyń Prezıdenti Qasym-Jomart Toqaevtyń qatysýymen ótip, «Adam kapıtaly, bilim, progress — Halyqtyq Konstıtýtsııanyń negizgi qundylyqtary» taqyrybyna arnaldy.
— Búginde biz úshin pedagogterdi daıarlaýdaǵy fragmentarlyq tásilden olardyń kásibı qalyptasýynyń tutas júıesine kóshý mańyzdy. Bolashaq muǵalim jaı ǵana dıplom alyp qoımaı, mamandyqty sanaly túrde tańdaýdan jáne sapaly daıarlyqtan bastap, mektepke sátti beıimdelý, tálimgerlik jáne odan ári kásibı damý kezeńderine deıingi júıeli joldan ótýi tıis. Sondyqtan jańa model ýnıversıtet pen mektep arasyndaǵy tyǵyz áriptestikke jáne nátıje úshin ortaq jaýapkershilikke negizdeledi, — dep atap ótti Ǵylym jáne joǵary bilim vıtse-mınıstri Gúlzat Kóbenova.
Sektsııanyń negizgi máselesi pedagogti daıarlaý, onyń kásibı qyzmetke kirýi jáne odan ári damýy úshin zamanaýı ekojúıeni qalyptastyrýǵa baǵyttalǵan Pedagogıkalyq bilim berýdi damytý tujyrymdamasy boldy. Tujyrymdamanyń negizgi tásilderin Abaı atyndaǵy Qazaq ulttyq pedagogıkalyq ýnıversıtetiniń prorektory Baný Narbekova tanystyrdy.
Usynylyp otyrǵan modeldiń negizinde muǵalimdi daıarlaýdyń dástúrli tásilinen pedagogtiń biryńǵaı kásibı ómirlik tsıkline kóshý jatyr. Ol bolashaq pedagogterdi kásibı baǵdarlaý men irikteýdi, joǵary oqý ornynda bilim alýdy, mektep ortasyna erte beıimdelýdi, mekteptegi kásibı qyzmetke kirýdi, tálimgerlikti jáne mamannyń úzdiksiz kásibı damýyn qamtıdy. Bul kásibı joldyń ártúrli kezeńderi arasyndaǵy sabaqtastyqty qamtamasyz etip, pedagogke qoıylatyn talaptardy onyń búkil mansaby boıynda ózara úılestirýge múmkindik beredi.
2029 jylǵa qaraı Tujyrymdama aıasynda «Ýnıversıtet 5.0» modeline kóshý boıynsha negizgi baǵdarlar aıqyndaldy. Modeldiń basty mindeti — yntaly ári quzyretti pedagog sapaly daıarlyqtan ótip, mamandyqqa kirigý kezeńinde qoldaý alyp, úzdiksiz kásibı damý múmkindikterine ıe bolatyn tutas júıe qalyptastyrý. Pedagogıkalyq joǵary oqý ornynyń rólin keńeıtý kózdeledi. Ol tek bilim berý protsesin uıymdastyryp qana qoımaı, bolashaq muǵalimniń kásibı qalyptasýyn júıeli túrde súıemeldep, onyń odan ári kásibı damý nátıjelerin baǵalaýy tıis.
Tujyrymdamanyń negizgi baǵyttarynyń biri — pedagogıkalyq bilim berýdiń praktıkaǵa baǵdarlanýyn kúsheıtý. Bul rette mektep pedagogıkalyq praktıkany óteıtin oryn retinde ǵana emes, bolashaq mamandy daıarlaýda pedagogıkalyq joǵary oqý ornynyń tolyqqandy seriktesi retinde qarastyrylady. Usynylyp otyrǵan sheshimderdiń qatarynda seriktestik jáne klınıkalyq mektepterdi damytý, stýdentterdi kásibı ortaǵa erterek beıimdeý jáne mektep tálimgerlerin daıarlaý júıesin qalyptastyrý bar.
Pedagogıkalyq joǵary oqý oryndarynyń óz túlekteriniń kásibı nátıjelerine jaýapkershiligine erekshe nazar aýdarylady. Osyǵan baılanysty bilim sapasyn baǵalaý tásilderin jetildirý usynylady. Bul rette stýdentterdiń ýnıversıtette alǵan bilim nátıjelerimen qatar, olardyń keıingi jumysqa ornalasýy, mekteptegi kásibı qyzmetke sátti kirigýi jáne kásibı damýynyń odan arǵy dınamıkasy da eskeriledi.
Tujyrymdamanyń jeke baǵyttarynyń biri — AI-Driven Pedagogy, ıaǵnı pedagogıkalyq qyzmette jasandy ıntellektini qoldanýdy damytý. Tehnologııalyq sheshimderdi oqytýdy jobalaý jáne derbestendirý, bilim berý derekterin taldaý, sondaı-aq pedagog jumysynyń tıimdiligin arttyrý úshin paıdalaný kózdeledi. Bul rette jasandy ıntellekt muǵalimniń múmkindikterin keńeıtetin qural retinde qarastyrylady, al adammen ózara árekettesýdi, tálimgerlikti jáne tárbıe jumysyn almastyratyn tehnologııa retinde qarastyrylmaıdy.
Sektsııa qorytyndysy boıynsha qatysýshylar pedagogıkalyq bilim berýdi odan ári damytý, joǵary oqý oryndary men mektepter arasyndaǵy ózara is-qımyldy nyǵaıtý, pedagogterdi daıarlaý men kásibı qoldaý tetikterin jetildirý, praktıkaǵa baǵdarlanǵan zertteýlerdi damytý jáne zamanaýı bilim berý tásilderin engizý jóninde usynymdar ázirledi.
Atalǵan tásilderdi iske asyrý muǵalim mamandyǵyna qoıylatyn ózgermeli talaptarǵa jaýap beretin zamanaýı pedagogıkalyq bilim berý júıesin qalyptastyrýǵa baǵyttalǵan. Ulttyq model pedagogtiń mansabynyń barlyq kezeńinde sapaly daıarlyq pen kásibı qoldaýdy qamtamasyz etýge, pedagog kadrlardyń sapasyn arttyrýǵa jáne adamı kapıtaldy nyǵaıtýǵa baǵyttalǵan. Túptep kelgende, bul myqty mektepti damytýǵa jáne bilim alýshylardyń oqý nátıjelerin arttyrýǵa yqpal etýi tıis.
Aıta ketelik Memleket basshysy Qasym-Jomart Toqaev ustazdar qaýymyn dástúrli Tamyz konferentsııasynyń ashylýymen quttyqtaǵan edi.
