Bolashaq meıirbıke Aqtóbeniń eń sulý arýy atandy
AQTÓBE. QazAqparat - Keńes Odaǵynyń batyry Mánshúk Mámetova atyndaǵy Aqtóbe medıtsınalyq kolledjiniń 18 jastaǵy stýdenti Elmıra Qablaı «Mıss Aqtóbe - 2018» baıqaýynyń jeńimpazy atandy, dep habarlaıdy QazAqparat tilshisi.
Búgin Aqtóbeniń eń sulý arýy tańdaldy. Qudaıbergen Jubanov atyndaǵy Aqtóbe memlekettik ýnıversıtetiniń Stýdentter saraıyna oblystaǵy orta arnaýly, joǵary oqý oryndarynyń stýdentteri jınaldy. Jankúıerler toby arnaıy daıyndalyp, úkilep qosqan arýyna qoldaý bildirdi. Uıymdastyrýshy «San Bell» kompanııasynyń habarlaýynsha, saıysta qyzdardyń sulýlyǵy, talanty men sheberligi baǵalandy. Fotosessııa úsh kıim úlgisinde ótti. Arýlar Qobylandy batyr atyndaǵy ortalyq stadıonda bolyp, «Aqtóbe» fýtbol klýbynyń kıim úlgisin jarnamalady. Al konkýrs kezinde Aqtóbeniń arýlary aldymen aq tústi kıimmen, keıin klassıkalyq úlgidegi kıimmen jáne keshki kóılekpen sahnada júrip ótti. Ári qyzyqty suraqtarǵa jaýap berdi. Sahnada arýlar ózderiniń basty qarsylasyn, ózine unaıtyn túsin, sulýlyq kútimin, tilegin aıtyp berdi.
Aıta keteıik, úsh saǵatqa sozylǵan baıqaý kezinde «Mıss Aqtóbe - 2018» baıqaýynda «Mıss Aqtóbe vırtýal» nomınatsııasyn symbaty men sulýlyǵy jarasqan Dılıara Ómirserikova jeńip aldy. «Mıss Aqtóbe - 2018» baıqaýynyń úshinshi orny Asylaı Baǵlanovaǵa, ekinshi oryny Baný Qosaeva, birinshi oryny Ásemgúl Qulmaǵambetovaǵa buıyrdy. Al bas júldeni Aqtóbe medıtsınalyq kolledjiniń 3 kýrs stýdenti Elmıra Qalbaı jeńip aldy.
«Men ózimniń jeńimpaz ekenimdi áli de sezine almaı otyrmyn. Sebebi, daıyndyq kezinde sulý da aqyldy qyzdardyń árqaısysy Aqtóbe arýy bolýǵa laıyqty ekenin bildim. Aldymen janymdaǵy qurbylarym, anam quttyqtady. Jańa múmkindik syılaǵany úshin uıymdastyrýshylarǵa alǵys aıtamyn. Aldaǵy ýaqytta Qazaqstan arýy baıqaýyna qatysyp, Aqtóbe namysyn laıyqty qorǵaımyn dep oılaımyn», - dedi Aqtóbeniń eń sulý arýy Elmıra Qalbaı «QazAqparat» tilshisine bergen suhbatynda.
«Mıss Aqtóbe - 2018» baıqaýynyń jeńimpazy kolledjdi aıaqtaǵan soń joǵary oqý ornyna túsýdi armandaıdy. Ol óz mamandyǵyn jaqsy kóredi.
«Medıtsına adam ómirimen tyǵyz baılanysty. Jaýapkershiligi joǵary mamandyqty óz qalaýymmen tańdadym. Aldaǵy ýaqytta osy salanyń bilikti mamany bolǵym keledi», - dedi Elmıra Qalbaı.
