Bolashaq quqyqtanýshylardyń respýblıkalyq olımpıadasy ótti
ShYMKENT. QazAqparat - Shymkentte quqyq salasy boıynsha ótken respýblıkalyq olımpıada óz máresine jetti. Elimizdegi joǵary oqý oryndarynyń stýdentteri arasynda uıymdastyrylǵan bilim saıysy Elbasynyń kezekti Joldaýy aıasynda ótkizilip otyr, dep habarlaıdy QazAqparat tilshisi.
«Quqyqtyq memleket qurýdaǵy qylmystyq zańnamanyń ózektiligi» atty saıysqa Almaty, Astana, Qyzylorda,Túrkistan men Shymkent qalalarynan 8 komanda qatysty. Shara barysynda shym shaharǵa qarasty Eńbekshi aýdandyq sotynyń tóraǵasy Aıdos Sultanov bilimgerlerge óz keńesin berdi. Elimizde qolǵa alynǵan jańa jobalardyń tıimdiligine toqtalyp, jastardy bilikti maman bolýǵa shaqyrdy. Zań salasynyń shákirtteri baıqaý barysynda ózderiniń teorııada alǵan bilimderin tájirıbe júzinde kórsetip baqty. Vıktorınalyq suraqtarǵa jaýap berip, oı tapqyrlyǵy men júıriktigin kórsetti. Birneshe kezeńnen turǵan saıysta stýdentter sot sheshimderiniń durys-burystyǵyn saralady.
Qorytyndysynda, úshinshi oryndy «Ádilet» jáne «Zańger» komandalary bólisse, ekinshi oryndy «Saqshylar» komandasy jeńip aldy. Birinshi orynǵa Aımaqtyq áleýmettik ýnıversıtettiń «Jeti jarǵy» komandasy laıyq dep tabyldy. Bas júldeni astanalyq komanda ıelendi.
Aıta keteıik, elimizde quqyq páni boıynsha jyl saıyn túrli saıystar ótkiziledi. Bul baıqaý Shymkent qalasynda alǵash ret uıymdastyrylyp otyr. Saıys qorytyndysyna saı, úzdik dep tanylǵan komandalar arnaıy syı-sııapattarmen marapattaldy.
