«Bolashaq» qory balalarǵa arnalǵan 35-shi fılmdi qazaq tiline dýblıajdady
ALMATY. QazAqparat - Almaty qalasynda qazaq tilinde dýblıajdalǵan «Mýlan» fılminiń premerasy ótti, dep habarlaıdy QazAqparat.
Dısneılik fılmniń aldyn ala kórsetiliminde sóılegen sózinde «Bolashaq» korporatıvtik qory qamqorshylyq keńesiniń qurmetti múshesi Baýyrjan Baıbek Elbasy el Táýelsizdigin jarııalaǵan sátten bastap memlekettik tildiń qoldaný aıasyn keńeıtý, bilikti de bilimdi jastardyń qataryn arttyrý, qazaq tilindegi sapaly aqparattyq ónimderdi kóbeıtý sekildi mańyzdy máselelerge erekshe nazar aýdaryp, basymdyq bergenine toqtaldy.
«El ekonomıkasy nyǵaıa qoımaǵan kezdiń ózinde 1993 jyly «Bolashaq» baǵdarlamasyn ashyp, talapty da daryndy jastardyń álemdegi úzdik oqý ordalarynda bilim alýyna jol ashty. Qazaq mektepteri men balabaqshalarynyń sanyn kóbeıtti. Osy baǵyttaǵy júıeli jumys nátıjesinde memlekettik tildiń qoldanylý aıasy keńeıip, mazmundyq bazasy nyǵaıyp keledi. Qazirgi tańda prezıdenttik «Bolashaq» baǵdarlamasy boıynsha bilim alǵan 14 myńǵa jýyq azamat elimizdiń ıgiligi jolynda jemisti qyzmet etip jatyr. Atalǵan baǵdarlama túlekteri qurǵan «Bolashaq» korporatıvtik qory elimizdiń zııatkerlik áleýetin kóterýdi maqsat etken túrli jobalardy iske asyrýda. Sonyń biri – qazaq tilindegi sapaly kontentti kóbeıtýge baǵyttalǵan «Ózińen basta» jobasy», - dedi Baýyrjan Baıbek.
Aıta keteıik, «Bolashaq» korporatıvtik qory bul jobany 2011 jyly qolǵa alyp, Disney kınostýdııasymen yntymaqtastyǵyn bastaǵan bolatyn.
Osy jyldar ishinde qordyń qoldaýymen sheteldik 34 úzdik fılmge dýblıaj jasalyp, sonyń arqasynda qazaq tili Disney stýdııasynyń 39-shy tili jáne Sony Pictures stýdııasynyń 7-shi tili retinde tizimge endi.
«Qordyń bul jobasyna Elbasy arnaıy nazar aýdaryp, qoldaý bildirdi. Búgin osy joba aıasynda qazaq tilinde dýblıajdalǵan Disney stýdııasynyń «Mýlan» fılmi kórermenge usynylyp otyr. Bul – atalǵan qordyń qazaq tiline dýblıajdap, kınoprokatqa shyǵarǵan 35-shi fılmi. ıAǵnı «bolashaqtyqtar» qazaq tilindegi sapaly kontentti kóbeıtýde mol tájirıbe jınap, úlken belesti baǵyndyryp otyr», - dedi Baýyrjan Baıbek osy iske atsalysqan azamattarǵa alǵysyn bildire otyryp.
Sondaı-aq, ol osy joba arqyly otandyq kıno salasy jańa fılmdermen tolyǵyp qana qoımaı, qazaq tilinde dýblıajdaý isi de óristegenin atap ótti.
Onyń aıtýynsha, bul baǵyttaǵy jumys ary qaraı da jalǵasyn tabady.
