«Bolashaq» - keleshegimizdi kemeldendiretin kúre jol

ASTANA. QazAqparat - 1991 jyly elimiz egemendik alǵannan keıin álemdik qoǵamdastyqqa tolyq ený úshin alǵashqy qadamdar jasala bastady. Ásirese, jastardyń sapaly jáne básekelestikke qabiletti bilim alý múmkindigin jasaýǵa úlken kóńil bólindi. Alǵash ret burynǵy keńestik memleketter keńistiginde daryndy jastarǵa shetelde tolyqtaı memleket esebinen bilim alý jobasy uıymdastyryldy. Qazaqstan Respýblıkasynyń Prezıdenti N.Á.Nazarbaevtyń 1993 jyly 5 qarashadaǵy №1394 qaýlysymen «Bolashaq» halyqaralyq stıpendııasy quryldy. Baǵdarlamanyń qurylýyna, sózsiz, ýaqyt talaby yqpal etken bolatyn.

«Bolashaq» halyqaralyq stıpendııasy - Qazaqstan Respýblıkasy azamattarynyń ozyq sheteldik joǵary oqý oryndarynda kúndizgi oqý formasy boıynsha oqýy úshin nemese sheteldik uıymdarda ǵylymı, pedagogıkalyq, ınjenerlik-tehnıkalyq jáne medıtsınalyq qyzmetkerlerdiń  taǵylymdamadan ótýi úshin qurylǵan halyqaralyq stıpendııa.

Alǵashqy kúnnen-aq, «Bolashaq» halyqaralyq stıpendııasy jastardyń kásibı damýy men mansaptyq ósýiniń berik kepiline aınaldy.

Bıyl Qazaqstan Respýblıkasy Táýelsizdiginiń 25 jyldyǵy men «Bolashaq» halyqaralyq prezıdenttik stıpendııasynyń 23 jyldyǵyna oraı «Halyqaralyq baǵdarlamalar ortalyǵynyń» uıymdastyrýymen «Bolashaq» - Qazaqstan tarıhynyń altyn paraǵy» atty qazaq, orys jáne aǵylshyn tilderinde derekti fılm túsirilgen bolatyn. Fılm barysynda buryn eshbir jerde jarııalanbaǵan aqparat pen Elbasymyz Nursultan Nazarbaevtyń sózderi, jalpy baǵdarlamanyń áli eshkim estip, bilmegen qyzyqtary baıandalǵan.

Osy jyly «Bolashaq» halyqaralyq stıpendııasyn taǵaıyndaýǵa qujattar qabyldaýy 11 sáýirde bastaldy. Jalpy elimizde atalǵan baǵdarlama boıynsha qujattardy kezeń-kezeńimen bir jylda  3 márte qabyldaıdy, atap aıtsaq, birinshi - 11 sáýirden bastap 13 mamyrdy qosa alǵandaǵy kezeń; ekinshi - 13 maýsymnan bastap 29 shildeni qosa alǵandaǵy kezeń; úshinshi - 15 tamyzdan bastap 30 qyrkúıekti qosa alǵandaǵy kezeń.

Úmitkerler «Bolashaq» halyqaralyq stıpendııasyn taǵaıyndaýǵa qujattardy elektrondy úkimet veb-portaly, «Azamattar úshin úkimet» memlekettik korporatsııasy arqyly (burynǵy HQO), sondaı-aq óz qolymen «Halyqaralyq baǵdarlamalar ortalyǵy» AQ-ǵa tapsyrdy.

            Sonymen qatar, «Bolashaq» halyqaralyq stıpendııasyn damytýdyń 2016-2020 jyldarǵa arnalǵan josparyna sáıkes «Bolashaq» halyqaralyq stıpendııa «Magıstratýra», «Doktorantýra», «Rezıdentýra» jáne «Taǵylymdamalar» baǵdarlamalary boıynsha taǵaıyndalyp, olarǵa sanatyna qaraı jekelegen talaptar qoıylatyn boldy.

              «Bolashaq» halyqaralyq stıpendııasy túlekteriniń memlekettik qyzmette, memlekettik jáne halyqaralyq uıymdarda, aktsıonerlik qurylymdardyń jaýapty salalarynda, memlekettik jáne halyqaralyq jobalarda jumys istep, osylaısha memlekettiń damýyna óz úlesterin qosýy olardyń mansaptyq ósýi men kásiptik jetilýiniń aıqyn dáleli ispettes. Aıta ketsek, qazirgi mınıstr Qýandyq Bıshimbaev, ákim Baýyrjan Baıbek pen Altaı Kólginov, Ǵabıdýlla Ábdirahymovtar, Maǵjan Áýezovter osy baǵdarlamanyń alǵashqy túlekteri.

El bolashaǵynyń jarqyn, júrer jolynyń dańǵyl bolýy jan-jaqty bilim alǵan, tárbıeli urpaqtyń qolynda ekendigi jasyryn emes. Solardyń sapaly bilimine baılanysty el erteńiniń kelbetin boljaı berýge bolady. Al, «Bolashaq» halyqaralyq stıpendııasy keleshegimizdi kemeldendiretin kúre joldardyń biri bolyp qala bermek.