«Bolashaq» qaýymdastyǵynyń Úndeýi: Kóshbasshy faktory - el jetistikteriniń negizi

ASTANA. QazAqparat - «Bolashaq» baǵdarlamasy stıpendıattarynyń qaýymdastyǵy 10 jyldan astam ýaqyt boıy óziniń bar qyzmetimen jastardy elimizdiń turaqty damýyn qamtamasyz etýge jumyldyra otyryp, Elbasy, Qazaqstan Respýblıkasynyń Prezıdenti Nursultan Nazarbaevtyń Memlekettik baǵdaryn qoldap keledi. Bul týraly «bolashaqtyqtardyń» Qazaqstannyń Tuńǵysh Prezıdenti kúnine oraı joldaǵan Úndeýinde aıtyldy.

Sheteldiń aldyńǵy qatarly ýnıversıtetterinde bilim alǵan 10 myńnan astam «Bolashaq» túlegi memlekettik qyzmette, bızneste, áleýmettik sferada, el bolashaǵy úshin asa mańyzdy kólik, kommýnıkatsııalar, aqparattyq tehnologııalar, qurylys, týrzım sııaqty salalarda Qazaqstannyń damýyna óz úlesterin qosýda.

Qazirgi jahandyq turaqsyzdyq jáne buryn-sońdy bolmaǵan daǵdarys jaǵdaıynda Elbasymyz ulttyq ekonomıkanyń damý qarqynyn saqtap qalý úshin elimizdiń ınfraqurylymdyq damýynyń strategııalyq jospary - Qazaqstannyń «Nurly jol» jańa ekonomıkalyq saıasatyn jarııalady.

Álemniń jetekshi elderiniń tájirıbesi memlekettiń aldaǵy ondaǵan jyldyq turaqty damýyna tek damyǵan ınfraqurylym ǵana kepil bola alatynyn dáleldep otyr.

Uly depressııa jyldarynda AQSh-ta aýqymdy kólik ınfraqurylymynyń salynýy, Marshall jospary aıasynda soǵystan keıingi eýropalyq joldar men magıstraldardyń qaıta jóndelýi, Batys Qytaıdaǵy jedel ınfraqurylymdyq damý baǵdarlamasy jáne t.b. osyǵan jarqyn mysal bola alady.

Infraqurylymǵa búgingi salynǵan ınvestıtsııa - erteńgi turaqty gúldený qamy!

«Qazaqstan-2050» strategııasynyń ajyramas bóligi retindegi «Nurly jol» jańa ekonomıkalyq saıasatynyń basty maqsaty - azamattarymyzdyń ál-aýqatyn arttyrý jáne «Máńgilik El» uly ıdeıasy jolynda Qazaqstannyń álemniń eń ozyq 30 eliniń qataryna qosylýy.

Baǵdarlamanyń tabysty bolýy ony júzege asyrýǵa jastardyń belsene atsalysýyna baılanysty. Bizdiń árqaısymyzdan otansúıgishtik, eńbekke degen jaýapkershilik, tózimdilik, yntymaqshyldyq talap etiledi. Biz qashanda Qazaqstannyń Tuńǵysh Prezıdentiniń ómirlik ustanymdary bolyp tabylatyn óz Otanyna jáne týǵan halqyna degen shynaıy mahabbatqa, jeke bas jaýapkershiligine jáne kásibılikke súıenýimiz kerek.

Tuńǵysh Prezıdenttiń arqasynda nebári 23 jyldyq táýelsiz damý barysynda Qazaqstan álemdik qaýymdastyqta bedeldi ozyq memleketke aınaldy.

Osy jyldar ishinde, ásirese áleýmettik-ekonomıkalyq daǵdarystar ýaqytynda, Elbasynyń batyl jáne kóregen sheshimderi Qazaqstannyń syn-qaterlerdi memleket úshin jańa múmkindikterge aınaldyra otyryp, qıyndyqtardy jeńip shyǵýyna múmkindik berdi.

Kóshbasshy faktory - el jetistikteriniń negizi!

Joldaýdyń tarıhı mańyzyn túısine otyryp, «Bolashaq» qaýymdastyǵy jastardy «Nurly jol» jańa ekonomıkalyq saıasatyn júzege asyrýǵa úles qosýǵa shaqyrady, sondaı-aq barsha qazaqstandyqtardy Tuńǵysh Prezıdent kúnimen quttyqtaıdy!