«Bolashaq» qaýymdastyǵy T.Musabaevtyń synı sózderin orynsyz dep esepteıdi
ASTANA. 5 qarasha. QazAqparat - Búgin «Bolashaq» qaýymdastyǵynyń atqarýshy dırektory Janna Tólegenova «Qazǵarysh» agenttiginiń basshysy Talǵat Musabaevtyń stıpendıattardyń tómen bilimi jaıyndaǵy synı sózderine jaýap qaıyrdy.
«Osy suraqqa jaýap bergim-aq keledi, biraq men pikir bildirýden aýlaq ustanamyn. Sebebi men orynsyz kúmán keltirgen osynaý joǵary laýazymdy tulǵanyń, asa bedeldi adamnyń abyroıyna nuqsan keltirgim kelmeıdi. Sol balalardyń qanshalyqty aýyr eńbekpen, úlken kúsh-jigermen bilim alyp jatqandaryn kórgen adam mundaı sóz aıtpas edi», - dedi J.Tólegenova «Bolashaq» baǵdarlamasynyń tıimdiligi jaıynda jasalǵan zertteýdiń tanystyrylymynda.
Onyń aıtýynsha, «Bolashaq» baǵdarlamasy iske asyrylyp jatqan 20 jyl ýaqyttan beri 333 qazaqstandyq stýdent túrli sebeptermen oqýdan shyǵyp qalǵan.
Eske sala keteıik, 29 qazan kúni ótken Úkimettiń kezekti otyrysynda QR Ulttyq ǵarysh agenttiginiń tóraǵasy Talǵat Musabaev «Bolashaq» baǵdarlamasyna kóńili tolmaıtyndyǵyn jáne onyń túlekteri bári birdeı bilimdi emestigin aıtqan bolatyn.
«Sońǵy kezde bizge «Bolashaq» túlekteri kele bastady. Biz olardy jumysqa alyp jatyrmyz. Biraq bárin emes. Sebebi bizge, ashyq aıtsaq, bakalavr mamandaryn tyqpalaıdy. Olardyń bilim deńgeıi tómen. Bizdiń salamyzǵa, kem degende, magıstrler kerek. Al syrahanada otyryp, aǵylshyn tilin úırengen adamnan kásibı maman shyǵady dep aıta almaımyn. «Bolashaqtyń» da túr-túri bar. Sondyqtan biz bilimi bar túlekterdi alamyz. Olardyń ózi kóp emes», - dedi Úkimet otyrysynda T.Musabaev.
