«Bolashaq» qaýymdastyǵy búkil respýblıka kóleminde semınarlar tizimi men bilim berý semınarlaryn ótkizýde
ASTANA. 3 qarasha. QazAqparat. «Bolashaq jastar úshin» jobasynyń aıasynda aǵymdaǵy jyldyń 30 qyrkúıek jáne 13 qarasha aralyǵynda jastardyń tabysty ınnovatsııalyq belsendiligin arttyrý maqsatynda «Bolashaq» qaýymdastyǵy búkil respýblıka kóleminde semınarlar tizimi men bilim berý semınarlaryn ótkizýde, dep habarlaıdy baspasóz qyzmeti.
Oqý-semınarlaryn aımaqtardyń erekshelikterine baılanysty ár túrli salalardyń damýyn boljaý men strategııalyq josparlaý taqyrybynda, ındýstrııaly-ınnovatsııalyq damý salasyndaǵy, kishi jáne orta bıznestegi, memlekettik saıasat salasyndaǵy sarapshylar júrgizedi. Alǵashqy semınarlar Óskemen, Almaty, Atyraý, Petropavl, Qyzylorda qalalarynda ótkizildi.
Qarasha aıynyń 4-5 kúnderi Astana qalasynda altynshy semınar ótkiziledi. Eki kúndik bilim berý baǵdarlamasy «Forsaıt-zertteý», «Innovatsııalyq jobalardy usyný, «Startaptyń potentsıalyn baǵalaý», «Intellektýaldyq sheberhana», «Qısyndy oılaý» atty bólimderden turady. Atalmysh semınarlardy halyqaralyq «Enterra» psıhologııa jáne damý ortalyǵynyń jetekshisi Lıýdmıla Býrlachenko, Astana qalasynyń ekonomıka jáne bıýdjettik josparlaý basqarmasynyń jetekshisiniń orynbasary Talǵat Baımaǵambetov, «Bolashaq» Qaýymdastyǵynyń uıymdastyrý-ádistemelik bóliminiń meńgerýshisi Aıan Áljanov júrgizedi.
Atalmysh is-sharanyń alǵashqy kúni semınarǵa qatysýshylar «Aımaqtyń damý strategııasy: maqsaty, baǵyttary, múmkindikteri, máseleleri» taqyrybynda, «Bilim qýaty» ujymdyq oılaýdyń ınnovatsııalyq tehnologııasyn meńgerý men qoldaný» modýli boıynsha oı qozǵaıdy. Sonymen qatar, qatysýshylarǵa aımaqtyń damýy jónindegi toptyq jobalardyń maqsattary men mindetterin anyqtaý usynylady.
