Bolashaq ınjenerleri: Qaraǵandyda eldiń úzdik jas mashına qurastyrýshylary anyqtaldy
QARAǴANDY. KAZINFORM — Qaraǵandyda II Respýblıkalyq mashına jasaýshylar olımpıadasynyń jeńimpazdary anyqtaldy. Qazaqstannyń túkpir-túkpirinen kelgen jas daryndar ózderiniń teorııalyq bilimin ǵana emes, tájirıbelik sheberligin de dáleldep, elde ınjenerlik salanyń jarqyn bolashaǵy bar ekenin kórsetti.
Olımpıadanyń aqtyq kezeńi 27 qyrkúıekte Qaraǵandy quıý-mashına jasaý zaýytynyń bazasynda ótti. Bıylǵy dodaǵa Aqtaý, Shymkent, Petropavl, Balqash jáne basqa da qalalardan barlyǵy 137 qatysýshy keldi. Olardyń ishinen tek 14 úmitker aqtyq synǵa joldama aldy. Fınalda jas ınjenerler materıaltaný men syzba salasynan suraqtarǵa jaýap berip, bólshekterdi jınap, tipti zamanaýı sandyq baǵdarlamamen basqarylatyn stanoktarǵa arnalǵan baǵdarlamalar qurastyrdy.
Bul sharanyń mán-mańyzy erekshe: 2025 jyl Qazaqstanda Jumysshy mamandyqtary jyly dep jarııalanǵan. Elde tehnıkalyq jáne ınjenerlik mamandyqtardyń bedelin júıeli túrde kóterý kózdelgen, al mashına jasaýshylar olımpıadasy osy baǵyttaǵy naqty qadamdardyń biri boldy.
— Bul olımpıada — ınjenerlik kásipterdi dáripteýdegi mańyzdy qadam. Biz búgin qarapaıym stýdentter men oqýshylardy emes, erteńgi kúni salanyń negizgi kadrlyq qoryn quraıtyn bolashaq mamandardy kórip otyrmyz, — dedi «Maker (Meıker)» JShS tehnıkalyq bóliminiń basshysy Almagúl Rahımbekova.
Al «Maker KLMZ» JShS basqarma tóraǵasy Jánibek Baıǵabelov qatysýshylardy quttyqtaı otyryp, mashına jasaý ónerkásibiniń el úshin strategııalyq rólin atap ótti.
— Daǵdarys kezeńinde nemese jetkizilimder toqtap qalǵan kezde Qazaqstan óz mamandaryna jáne otandyq óndirisine súıenýi tıis. Sondyqtan mundaı bastamalar bolashaq ınjenerlerdi der kezinde daıarlaýǵa úlken múmkindik beredi, — dedi ol.
Fınalǵa qatysqan jastar úshin olımpıada kásibı tańdaýdyń durystyǵyn taǵy bir dáleldedi. Petropavldan kelgen Nıkolaı Berezka bas júldeni ıelenip, bul salaǵa áýestigi bala kezden bastalǵanyn aıtty.
— Men kishkentaıymnan qolymmen birdeńe qurastyrýdy jaqsy kórdim — aldymen konstrýktor, keıin metallmen jumys istedim. Alǵash ret stanokta shahmat fıgýralaryn oıyp jasadym, sodan keıin bul salaǵa birjola qyzyqtym. Qaraǵandyda men ómirimdi osy kásippen baılanystyrǵym keletinin túsindim, — dedi ol.
Fınaldaǵy eń jas qatysýshy, qaraǵandylyq 11-synyp oqýshysy Egor Shevnın, avtomattandyrýǵa erekshe qyzyǵýshylyq tanytatynyn jetkizdi.
— Búginde zaýyttar jańa tehnologııalarǵa kóship jatyr, aqparattyq júıelerdiń róli kún sanap artýda. Men IT salasyn oqyǵym keledi, biraq mashına jasaý da ómirimde qoldanbaly baǵyt retinde qalady, — dedi jas ınjener.
Á. Saǵynov atyndaǵy QarMTÝ rektory apparatynyń jetekshisi, tehnıka ǵylymdarynyń doktory Arıstotel Isaǵulov ta fınalǵa joǵary baǵa berdi.
— Fınalıster kúrdelengen tapsyrmalardy da senimdi oryndady. Jastardyń júıeli oılap, sheshimderin dáleldeı bilýi qýantady. Bul — salada myqty aýys-túıistiń bolatynyn ańǵartady, — dedi ol.
Uıymdastyrýshylardyń aıtýynsha, olımpıadaǵa qyzyǵýshylyq jyl sanap artyp keledi: byltyr 120 qatysýshy bolsa, bıyl 137-ge deıin ósken. Sharanyń basty maqsaty — oqýshylar men stýdentterge ınjener mamandyǵynyń qyr-syryn tanystyrý, zamanaýı zaýyttar men ýnıversıtetterdiń múmkindikterin kórsetý jáne jastardy osy salada bilimin jalǵastyrýǵa yntalandyrý.
Jarystyń jeńimpazdary:
- I oryn — Nıkolaı Berezka (Petropavl, B. Áshimov atyndaǵy Petropavl mashına jasaý jáne kólik kolledji, 4 kýrs). Syılyq — 4 jyldyq oqý granty.
- II oryn — Aǵybaı Dýmanuly (Balqash, «Qazaqmys» korporatsııasynyń polıtehnıkalyq kolledji, 4 kýrs). Syılyq — 1 jyldyq oqý granty.
- III oryn — Mereı Noǵaıbaeva (Shymkent, Nazarbaev Zııatkerlik mektebi FMB, 12-synyp). Syılyq — MacBook noýtbýgi.
Barlyq fınalıster marapattaldy. Uıymdastyrýshylardyń aıtýynsha, olımpıada aldaǵy ýaqytta dástúrli túrde ótkizilip, onyń qatysýshylary Qazaqstan mashına jasaý salasynyń tiregine aınalatyn jańa býyn ınjenerler bolady.
Osyǵan deıin elimizde mashına jasaý salasynda maman tapshylyǵy týraly jazǵan bolatynbyz.