«Bolashaq» halyqaralyq stıpendııasynyń basym mamandyqtar tizbesi 74-ke jetti

Bul týraly búgin Aqordada QR Memlekettik hatshysy Qanat Saýdabaevtyń tóraǵalyǵymen ótken Shetelde kadrlar daıarlaý jónindegi komıssııanyń otyrysynan keıin BAQ ókilderine suhbat bergen QR BǴM Strategııalyq josparlaý jáne aqparattyq tehnologııalar departamenti dırektorynyń orynbasary Aqerke Abylaıhan málim etti.

«Búgingi otyrys barysynda 2012 jyldyń basty 74 mamandyq tizbesi bekitildi. Onda tehnıkalyq mamandyqtarǵa, atap aıtqanda, buǵan deıin de daıyndyq júrgizilgen geologııa, mashına jasaý, atom ónerkásibi, avıatsııa salalarynda ózimizdiń mamandardy ázirleýge basa nazar aýdarylyp otyr», - dedi ol.

Sonymen qatar, onyń atap ótýinshe, aǵymdaǵy jyly «Bilim týraly» zańǵa engizilgen tolyqtyrýlar men ózgertýlerge baılanysty «Bolashaq» baǵdarlamasy aıasynda kelesi jyldan bastap pedagog kadrlarmen qatar ınjenerlik-tehnıkalyq kadrlardyń, medıtsına mamandarynyń taǵlymdamadan ótýi kózdelgen.

Esterińizge sala keteıik, búgingi otyrys barysynda 216 azamatqa «Bolashaq» stıpendııasy taǵaıyndaldy. Jalpy qujat tapsyrǵan 389 azamattyń 159-y Ulybrıtanııada, 91-i AQSh-ta, 34-i Reseıde, 19-y Germanııada bilim alǵysy keledi. Al qalǵan úmitkerler Frantsııa, Italııa, Avstralııa, Qytaı, Nıderlandy, Norvegııa, Chehıa, Kanada, Slovakııa, Avstrııa, Shveıtsarııa elderin tańdady.