«Bolashaq» halyqaralyq baǵdarlamasynyń sheńberinde jańa qoǵamǵa saı pedagogter daıarlaýdy bastaımyz - B. Jumaǵulov
TANA. 25 tamyz. QazAqparat /Jasulan Amanbaıuly/ - Bul týraly búgin Astanada «Otbasy, mektep, qoǵam - ıgilikti bolashaq úshin birge!» respýblıkalyq pedagogıkalyq forým barysynda QR Bilim jáne ǵylym mınıstri Baqytjan Jumaǵulov málim etti.
Onyń aıtýynsha, qazirgi tańda pedagogıkalyq mamandyq boıynsha memlekettik grantqa ótý bally - elimizdegi eń tómengi ball bolyp otyr. «Sheteldik tájirıbe múldem basqasha. Mysaly, Ońtústik Koreıada úzdik mektep bitirýshilerdiń 5%-y, Fınlıandııada-10%-y, Sıngapýr men Gonkongta -30%-y ustaz bolady», - dep túıdi B. Jumaǵulov.
Osyǵan oraı, joǵary oqý oryndarynda muǵalimderdi daıarlaý júıesin jańartý qajet ekendigine toqtalǵan mınıstr, «joǵary oqý ornyndaǵy pedagogıkalyq mamandyqtar boıynsha oqytýdyń tujyrymdamasy men standarttaryn túbirimen qaıta qarastyrylatyndyǵyn" qadap aıtty jıynda.
Jańa tujyrymdama boıynsha, pedagogter daıarlaıtyn joǵary oqý oryndarynyń tizbesi qaıta jasalmaq. Bilim mınıstrliginiń málimetteri boıynsha, qazir pedagogterdi 89 joǵary oqý orny daıarlaıdy. Ár jyl saıyn 34 myń túlek bitiredi.
«Bolashaq» halyqaralyq baǵdarlamasynyń sheńberinde jańa qoǵamǵa saı pedagogter daıarlaýdy jáne olardyń biliktiligin arttyrýdy bastaımyz. Bul úshin aǵymdaǵy jyly 85 orynǵa kvota bólindi. Osylardyń bári muǵalim kásibine degen qyzyǵýshylyqty arttyrady. Talantty jáne jigerli jastardy pedagog mamandyǵyna tartýǵa múmkindik beredi», - deıdi B. Jumaǵulov.
