«Bolashaq» halyqaralyq stıpendııasy 217 qazaqstandyqqa berildi

ASTANA. KAZINFORM – Memlekettik keńesshi Erlan Qarınniń tóraǵalyǵymen Shetelde kadrlar daıarlaý jónindegi respýblıkalyq komıssııanyń kezekti otyrysy ótti, dep habarlaıdy Kazinform Aqordaǵa silteme jasap.

Qazirgi tańda «Bolashaq» halyqaralyq stıpendııasyna úmitkerler sany óte kóp. Barlyq baǵdarlama men baǵyttar boıynsha jalpy konkýrs bir orynǵa 4 adamdy qurady. 

Bıyl bul jańa ereje boıynsha ótkizilip jatqan «Bolashaq» stıpendııasyn taǵaıyndaýǵa arnalǵan ekinshi baıqaý atap ótken jón. Úmitkerler konkýrstyq irikteýdiń úsh kezeńinen ótti: keshendi testileý, áńgimelesý jáne eń joǵary ball jınaǵan qatysýshylardy Respýblıkalyq komıssııa irikteý. 

Shákirtaqy alýǵa 981 úmitker ótinish bildirdi. Onyń 916-sy birinshi, 659-y ekinshi, 217-si úshinshi kezeńdi aıaqtady. 

Otyrys barysynda Respýblıkalyq komıssııa 217 Qazaqstan azamatyna «Bolashaq» halyqaralyq stıpendııasyn taǵaıyndaý týraly sheshim qabyldady. 

Onyń ishinde 167 adam magıstratýrada, 13-i doktorantýrada, al 37 qazaqstandyq álemniń úzdik ýnıversıtetteri men ortalyqtarynda kásibı taǵylymdamadan ótedi. 

Bul rette stıpendıattardyń 67,7%-y jaratylystaný jáne tehnıkalyq pánder boıynsha, 32,3%-y áleýmettik-gýmanıtarlyq baǵytta bilim alady. 

Respýblıkalyq komıssııa ǵylymı taǵylymdamadan ótýge konkýrstyq irikteý nátıjelerin de qarady. Barlyǵy 165 ótinim berildi. Úsh deńgeıli konkýrstyq irikteý qorytyndysy boıynsha 68 qazaqstandyqqa álemniń jetekshi ǵylymı-zertteý ortalyqtarynda ǵylymı taǵylymdamadan ótýge stıpendııa berildi. 

Kezdesý qorytyndysy boıynsha Memlekettik keńesshi Erlan Qarın «Bolashaq» halyqaralyq stıpendııasyn odan ári júzege asyrý jáne jetildirý boıynsha naqty tapsyrmalar berdi.