«Bolashaq» grantyna úmitkerden orys tilin bilý talap etilgeni ras pa — mınıstr jaýaby

ASTANA. KAZINFORM — Ǵylym jáne joǵary bilim mınıstri Saıasat Nurbek «Bolashaq» grantyna úmitker bolǵan Jasulan Temirbaev esimdi azamattyń áleýmettik jelidegi málimdemesine pikir bildirdi.

Atalǵan azamat áleýmettik jelide «Bolashaq» baǵdarlamasy boıynsha konkýrsqa qatysqan kezde komıssııa músheleri onyń orys tilin jaqsy bilmegendikten kandıdatýrasyn qabyldamaǵanyn málimdegen bolatyn. 

— Bul málimet aqıqatqa saı emes. Sebebi bizde konkýrstyq protsedýralar eki satymen ótedi. Birinshi satyda test tapsyrady. Ekinshi satyda táýelsiz sarapshylar komıssııasymen suhbat júrgiziledi. Birneshe jyldan beri búkil suhbattar vıdeoǵa jazylady. Biz osy máseleni birden qolǵa aldyq. Vıdeony qaraǵanda ondaı suraqtar qoıylǵan joq. Búgin vıdeo jarııalanady. Nelikten birden jarııalamadyq? Sarapshylardan biz ruqsat alýymyz kerek edi. Resmı túrde! Sebebi olardyń da quqyǵy eskerilýi kerek, — dedi ol.

Mınıstr shaǵym ıesiniń suhbatyn arnaıy kórip shyqqanyn aıtty.

— Ókinishke qaraı, bizdiń qoǵamda haıp kóp. Meılinshe, komıssııa, konkýrstyq protsedýralar basqa jerde de biz maksımaldy túrde tsıfrlyq formatqa jáne vıdeojazba retinde júrgizip jatyrmyz. Ǵylym salasynda da vıdeotirkeýge jatady, — dedi ol.

Buǵan deıin «Bolashaq» stıpendııasynan aıyrylǵandardyń sany belgili bolǵan edi.