«Bolashaq gospıtali» jobasy sheńberinde birqatar biregeı operatsııalar jasaldy

dep habarlaıdy Pm.kz saıtynan Ulttyq medıtsınalyq holdıngtiń baspasóz qyzmetine silteme jasap.

Joǵary mamandandyrylǵan medıtsınalyq qyzmetter Ulttyq biryńǵaı densaýlyq saqtaý júıesinde qarastyrylǵan tegin medıtsınalyq kómektiń kepildendirilgen kólemi (TMKKK) sheńberinde kórsetiledi.

2011 jyly kardıohırýrgııalyq ortalyqta Heart Ware qurylǵysynyń sońǵy shyǵarylymy ımplantatsııalandy. Osynyń arqasynda Qazaqstan  ashyq júrekke biregeı joǵary tehnologııalyq operatsııa jasaıtyn anaǵurlym damyǵan 22 eldiń qataryna endi.

«2012 jyly júrektiń sozylmaly jetispeýshiligimen syrqattanatyn patsıentke donorlyq júrekti transplantattaý  - otandyq medıtsınadaǵy úlken jańalyq boldy», - delingen baspasóz qyzmetiniń habarlamasynda.

Kardıolog-dárigerlerdiń toby donor júreginiń jaǵdaıyn baǵalap, patsıent tinderimen sáıkestigine ımmýnologııalyq tekseris jasaý úshin  materıal aldy. Dıagnostıkalyq ortalyqtyń zerthana mamandary óz kezekterinde qajetti zerthanalyq zertteýler júrgizdi.

38 jastaǵy patsıentke mıyna qan quıylyp qaıtys bolǵan 46 jastaǵy áıel donor boldy. Qazir operatsııa jasalǵan patsıent hırýrgııalyq brıgadanyń táýlik boıy baqylaýymen jansaqtaý bóliminde jatyr.

Sonymen qatar, kardıohırýrgııalyq ortalyq bazasynda júrekke qan shyǵarmaı operatsııa jasaý ádisi ıgerildi. Jańa tásil anaǵurlym qaýipsiz, kesýdi jáne júrekti toqtatýdy talap etpeıdi, ári ońalý ýaqyty da edáýir qysqarady.

Mundaı operatsııalar aorta qaqpaqshasynyń stenozy bar 6 patsıentke jasaldy. Dárigerlerdiń aıtýynsha, operatsııa jasalǵan naýqastar birneshe kúnnen keıin qalypty ómirge oralǵan: olardyń entigýi men keýde tusyndaǵy aýyrýy basylyp, óz betimen júre alatyn halge jetken.

Sondaı-aq, 2012 jylǵy 3 shilde kúni kardıohırýrgııalyq ortalyqta tuńǵysh ret naýqasqa jasandy júrek salý operatsııasy jasalǵan.

Jasandy júrek júrek-qan tamyrlary júıesiniń aýyr  zaqymdanýynan zardap shegetin 61 jastaǵy naýqasqa salynǵan. Bul osyndaı qurylǵymen jasalyp otyrǵan álemdegi úshinshi operatsııa. Birinshi operatsııa Germanııada, ekinshisi - AQSh-ta jáne úshinshisi Qazaqstanda jasalǵan.

Jasalǵan operatsııanyń máni  - júrektiń oń jáne sol qalqanshalaryn tolyǵymen alyp tastap,  tabıǵı júrektiń jumysyna sáıkes mınýtyna 10 lıtrge deıin qan aıdaý múmkindigi bar Heart Ware - jasandy júrek qalqanshalarynyń  qosymsha qan aıdaıtyn eki sorǵysynyń ornalastyrylýynda.

Qazaqstandyq neırohırýrgııanyń basty jetistikteriniń biri - Ana men bala ortalyǵynda asqynǵan mıeloblystyq leıkozben syrqattanǵan balaǵa allogendik (ekinshi adamnan) súıek kemigin transplanttattaý boldy.

Ústimizdegi jyldyń sáýir aıynda óskemendik 15 jasar Nıkolaı Pshenıanovqa súıek kemigi kóshirilip salyndy. Qazirgi kezde súıek kemigi tolyǵymen bitisip ketken, saýyǵý zerthanalyq túrde rastalǵan.

Budan basqa neırohırýrgııa ortalyǵynda bıyl tuńǵysh ret omyrtqa julynyn neırostımýlıatsııalaý boıynsha operatsııa jasaldy.

Jalpy, qazirgi kezde búkil elimiz boıynsha emdeý men dıagnostıkalaýdyń joǵary tehnologııasy qarqyndy damýda jáne olar el óńirleriniń barlyq deńgeıdegi medıtsına mekemelerinde keńinen qoldanylýda.

QR Densaýlyq saqtaý mınıstrliginiń aqparyna qaraǵanda, І jartyjyldyqta óńirlerde joǵary mamandandyrylǵan medıtsınalyq kómek alǵan naýqastar sany 3 ese artyp, 8910 adamdy, nemese jalpy naýqastar sanynyń 57,4%, respýblıkalyq klınıkalar deńgeıinde 42,6% quraǵan. Kardıohırýrgııalyq qyzmettiń artýy úıinde qaıtys bolǵan naýqastar sanyn 40%, statsıonarda qaıtys bolǵan naýqastar sanyn 12% azaıtqan.

Ústimizdegi jyly holdıng klınıkalarynda túrli aýrýlardy emdeý men dıagnostıkalaýdyń 41 ınnovatsııalyq tehnologııasyn engizý josparlanýda. 2008 jyldan beri Ulttyq medıtsınalyq holdıngtiń klınıkalarynda medıtsınalyq qyzmettiń ımport almastyrǵyshtyǵyn arttyrǵan barlyǵy 110 ınnovatsııalyq tehnologııalar engizilgen.

Bárimizge belgili, QR Prezıdenti N.Á.Nazarbaevtyń tapsyrmasymen Ulttyq medıtsınalyq holdıngtiń bazasynda emdeý jáne jańa medıtsınalyq tehnologııalardyń aldyńǵy qatarly kóshbasshysy bolýǵa laıyq «Bolashaq gospıtali» jobasy júzege asyrylýda.