Bolashaq erli-zaıyptylarǵa «Baqytty otbasy» jadynamasy ázirlenip jatyr
«Aqparat jáne qoǵamdyq damý mınıstrligi BUU Halyqtyń qonystanýy qorymen (ıÝNFPA) birlesip, oń otbasylyq dástúrlerdi saqtaý, otbasyn josparlaý jáne erler men áıelderdiń reprodýktıvti densaýlyǵyn saqtaý máseleleri boıynsha nekege turatyn juptardyń habardar bolýyn arttyrý tujyrymdamasyn ázirledi. Bul tujyrymdamanyń nekeni resmı tirkeýdiń aldyndaǵy kezeńde genderlik teńdik, reprodýktıvti densaýlyq jáne sanaly ata-ana bolý problemalaryn qosa alǵanda, otbasy ómiriniń keń aýqymdy máseleleri boıynsha qajetti aqparat berý arqyly azamattardyń quqyqtary men múddelerin qorǵaýdy qamtamasyz etý salasyndaǵy memlekettiń áleýetin keńeıtetin mańyzy bar. Habardarlyqty arttyrý tetikterin damytý trenıngter ótkizý arqyly josparlanýda», - dep atap ótedi mınıstrlikten agenttik tilshisine bergen jaýabynda.
Vedomstvo málimetinshe, osy jyldyń sońyna deıin ajyrasý deńgeıi joǵary jekelegen óńirlerde nekeni tirkeýge ótinish bildirgen azamattarǵa otbasyn josparlaý jáne otbasylyq psıhologııa, reprodýktıvti densaýlyq, otbasylyq bıýdjetti josparlaý jáne basqa da mańyzdy máseleler boıynsha oqytý pılottyq joba iske qosylady.
Oqytý tegin. Ár trenıngtiń uzaqtyǵy - alty astronomııalyq saǵat.
Onyń barysynda qatysýshylar táýelsiz taqyryptyq bloktardy ıgerýge múmkindik alady: seriktestik jáne jaýapkershilik; otbasyn josparlaý jáne reprodýktıvti densaýlyq; quqyqtyq saýattylyq; turmystyq zorlyq-zombylyqqa nóldik tózimdilik; qarjylyq saýattylyq; emotsıonaldy ıntellekt jáne otbasy ishindegi jáne odan tys qarym-qatynas daǵdylary.
Nekege deıingi trenıngten ótý týraly sheshim qabyldaǵan erli-zaıyptylar barlyq modýlderdi bir kúnde ıgere alady nemese belgili bir taqyryptyq modýlderdi aıaqtaýǵa tirkelip, birneshe kún boıy oqýdan ótedi.
Trenıngter offlaın jáne onlaın rejıminde ótkiziledi. Uzaq merzimdi perspektıvada (10 jyl) tsıfrlandyrýdy tereńdetý onlaın rejımge tolyq kóshýdi qamtamasyz etýge múmkindik beredi.
Trenıng barysynda usynylatyn aqparattyń joǵary sapasy mamandardyń beıne dáristerin paıdalanýdy jáne bilikti jattyqtyrýshylardyń jumysyn kózdeıtin kombo-formatty qoldaný arqyly qamtamasyz etiledi.
Osy sharany iske asyryp, ony engizýdiń áserin baǵalaǵannan keıin óńirler sanyn ulǵaıtý týraly másele qaralady.
«Sondaı-aq, BUU Halyqtyń qonystanýy qorymen birlesip, bolashaq erli-zaıyptylar úshin «Baqytty otbasy» jadynamasy ázirlenýde. Jadynamada qazirgi otbasy ınstıtýtyna tán táýekelderdi azaıtýǵa múmkindik beretin usynystar jazylady. Mundaı táýekelderge turmystyq zorlyq-zombylyq, reprodýktıvti dısfýnktsııa men bedeýlik, ata-analyq jaýapkershilik pen seriktestik teńdiktiń joqtyǵy jatady. Jadynama ázirlengennen keıin Elektrondyq úkimet portalynda ornalastyrylýy múmkin. Budan basqa, nekeni tirkeýge ótinish bergen azamattardy osy materıaldarmen mindetti túrde tanystyrý jónindegi optsııa kózdelýde», - dep atap ótedi mınıstrlikten.
