Bolashaq energııasy - bul bos sóz emes - Qaırat Ábdirahmanov
ASTANA. QazAqparat - Bolashaq energııasy - bul bos sóz emes. Mundaı pikirdi búgin «Áıelder bolashaqtyń energııasyn qoldaıdy» atty halyqaralyq forým barysynda QR Syrtqy ister mınıstri Qaırat Ábdirahmanov bildirdi, dep habarlaıdy QazAqparat.
«Biz energetıkalyq revoltsııany ilgeriletýge tıispiz. Bul rette adamzattyń jartysyn quraıtyn áıelder barynsha belsendilik tanytýy qajet. Qazaqstan Prezıdenti Nursultan Nazarbaev genderlik parıtetti, sonymen qatar saıasat, ekonomıka jáne tehnologııalyq protsesster salasyndaǵy erler men áıelderdiń teńdigin tolyqtaı qoldaıdy. «Jasyl kredıtteý» júıesin jáne áıelderdiń «jasyl jobalarǵa» qatysýyn keńeıtý áıelder men qyzdar úshin ekonomıkalyq múmkinshilikterdi keńeıtý arqyly tıimdi jasyl bıznes modeldi damytýǵa septigin tıgizedi. Qazaqstan óziniń syrtqy saıasatynda mýltıpolıarlyqty jáne teń negizde barlyq eldermen beıbit qarym-qatynasty ustanady. Barlyǵymyz da bolashaq energııasy - bul bos sóz emestigin túsinemiz», - dedi Qaırat Ábdirahmanov.
Ol EKSPO alańynda Halyqaralyq jasyl tehnologııalar men ınvestıtsııalyq jobalardy damytý ortalyǵy qurylatyndyǵyn atap ótti. Sonymen qatar «Astana» halyqaralyq qarjy ortalyǵy dál sondaı halyqaralyqtarmen jáne barlyq ındýstrıaldy eldermen yntymaqtastyqty jolǵa qoıatynyn aıtty.
«Búgingi forým áıelderdi barlyq qıyndyqtan arylýǵa kómektesýge baǵyttalǵan. Óıtkeni olar balamaly energııa kózderin alýǵa laıyqty. Buǵan qosa, áıelder jer sharynda atalǵan qozǵalystyń aldyńǵy leginde tur», - dedi Syrtqy ister mınıstri.
Aıta keteıik, forým jumysyna álemniń 25 elinen 300-den astam delegat qatysýda. Olardyń arasynda RF Federaldy jınalysynyń Federatsııa keńesi tóraıymynyń orynbasary Galına Karelova, Belarýs Prezıdenti Ákimshiliginiń basshysy Natalıa Kochanova, Qyrǵyzstannyń vıtse-permer-mınıstri Cholpan Sultanbekova, Jahandyq áıelder sammıtiniń prezıdenti Iren Natıvıdad, jasyl ekonomıka men balamaly energetıka salasyndaǵy álemdik áıelder qaýymynyń, memlekettik organdardyń, bıznes salasynyń, úkimettik emes uıymdar men Qazaqstan áıelder qoǵamdastyǵynyń ókilderi bar.
