«Bolashaq energııasy» atty jastar arasynda ótken respýblıkalyq konkýrs nátıjeleri belgili boldy
ASTANA. 13 jeltoqsan. QazAqparat - «Bolashaq energııasy» «EXPO-2017» kórmesin qolda! Elimizdi qolda!» taqyrybynda eń úzdik esse men uranǵa jarııalanǵan respýblıkalyq konkýrstyń qorytyndysy shyǵaryldy,
dep habarlady QR Baılanys jáne aqparat mınıstrliginiń baspasóz qyzmetinen.
Konkýrs 12 qyrkúıek pen 30 qazan aralyǵynda EXPO-2017 Halyqaralyq mamandyrylǵan kórmesin Astana qalasynda ótkizýge ótinish berý aıasynda ótkizildi.
«Qazaqstandyq stýdentter men oqýshylardyń «Bolashaq energııasy» taqyrybyna erekshe qyzyǵýshylyq tanytqany óte mańyzdy. Jumystardy oqı otyryp, daryndy jastardyń kóbisiniń qazirden bastap balamaly energııa kózderin damytýǵa ózindik kózqarastary, sondaı-aq naqty usynystar men sheshimderi bar. Jastar men shyǵarmashylyq ujymdardy osyndaı sharalarǵa tartý EXPO-2017 Halyqaralyq kórmesin Astanada ótkizý ótinimin jyljytýǵa jańa serpin beretini sózsiz. Búgingi "Bolashaq energııasy" konkýrsyna qatysyp júrgen stýdentter men oqýshylar bes jyldan keıin Astanadaǵy EXPO-2017 kórmesin uıymdastyrýǵa at salysady dep senemiz», - dep atap ótti konkýrstyq komıssııa tóraǵasy, QR Ekonomıkalyq damý jáne saýda mınıstrliginiń Saýda komıteti tóraǵasynyń orynbasary Qaırat Tilebaldınov.
Aıta keterlik bir jaıt, konkýrsanttar qatarynda Astana oqýshylary ǵana emes, sonymen qatar Qazaqstannyń ózge de óńirleriniń jastary belsene qatysty. Barlyǵy 60-tan astam ótinish kelip tústi, balalar esse men urandardy memlekettik, orys jáne aǵylshyn tilderinde jazdy.
Konkýrstyq komıssııasynyń múshesi, QR Indýstrııa jáne jańa tehnologııalar mınıstrliginiń Elektr energetıkasy jáne kómir ónerkásibi departamenti tóraǵasynyń orynbasary Vladımır Klıakın: "Energııa jáne jastar shyǵarmashylyǵy bul - bizdiń bolashaǵymyz. Jastardy toptastyrý, olardyń belsendiligin arttyrý, ekologııa men energetıka salalarynyń máselelerin sheshýge tartý osynyń barlyǵyn konkýrs uımdastyrarda kózdegen edik. Degenimizge jettik dep oılaımyn. Eń úzdik uran men esse saıysy energııa saqtaý salasyndaǵy ınnovatsııalyq jobalardyń iske asýyna túrtki bolady degen senimdemin. Al qazirgi zamanǵy ilgeri oılar, energııany turaqty paıdalanýǵa kóshýdiń jolyn ashady", - deıdi.
Saıys jumystary jastardyń energetıka jáne energııa qorlaryn saqtaý máselelerin sheshýge daıyn ekendigin kórsetti. Jazylǵan esselerdiń barlyǵy da obektıvti málimetterdiń taldaýyna súıengeni, olardyń zertteý sıpaty men saraptaý elementerimen aıqyndalady.
Sonymen eń úzdik dep Qaraǵandy oblysy Abaı aýdanynyń turǵyny Maǵjan Qutjannyń jazǵan shyǵarmasy tanyldy. Eń úzdik urannyń «Save Today. Survive Tomorrow» avtory - L.Gýmılev atyndaǵy EUÝ-niń stýdenti Gaýhar Janjolova.
