Bolashaq ekonomıka shıki resýrstardy shapshań satýǵa emes, adamı resýrstar týdyratyn ınnovatsııalarǵa táýeldi bolmaq - Aýstrııa eks-kantsleri Alfred Gýzenbaýer
ASTANA. 10 qyrkúıek. QazAqparat - Bolashaqta ekonomıkalyq ósim shıkizat resýrstaryn shapshań satýǵa emes, adamı resýrstar týdyratyn ınnovatsııalarǵa táýeldi bolmaq. Búgin Elordadaǵy Táýelsizdik saraıynda ótken Damýshy naryqtardyń ІІ Eýrazııalyq forýmynda Aýstrııanyń eks-Federaldyq kantsleri Alfred Gýzenbaýer osylaı málim etti.
«Kóptegen damýshy elder, onyń ishinde Qazaqstan da búginge deıin kedeıliktiń shegin eńserý múmkindigin sátti paıdalandy. Endigi másele - búkil álemniń aldynan kese kóldeneńdep turatyn teńsizdikterdi joıý. Al bul baǵyttaǵy adamı kapıtaldy, adamı resýrstardy joǵary deńgeıde paıdalaný arqyly biz olardyń barlyǵyn ónimdi ekonomıkaǵa tarta alamyz», - dedi eks-kantsler.
Onyń aıtýynsha, keleshek álemniń perspektıvasynda mańyzdy másele - bilim berý. «Biz búgingi kúni búkil álem boıynsha bilim berý revolıýtsııasynyń tabaldyryǵynda turmyz. Bilim berý revolıýtsııasy - bul sol bilim pıramıdasynyń eń ushynda ǵana emes, onyń tabanynan bastap barlyq deńgeıin qamatamasyz etýi shart. Osy baǵytta jastardyń áleýetin 100 paıyzǵa paıdalanýǵa tıispiz, olardy jalpy bilimge tartyp, kásibı-tehnıkalyq oqytýdy eń joǵary deńgeıde uıymdastyrýǵa tıispiz. Sosyn qoldanbaly biliktilikke oqytyp, ondaı órender óz kezeginde ındýstrııa men qyzmet kórsetý salasyndaǵy ózgeristerge der kezinde basqarýǵa úırenýleri qajet. Bilim berý júıesiniń barlyq bitirýshileri joǵary bilikti bolýlary kerek ári osynyń bári birdeı ýaqytta júzege asýy shart. Sonymen qatar, dál osy bilimmen ushtasqan másele Qazaqstan sekildi memleketter úshin asa mańyzdy. Óıtkeni, Qazaqstan halqynyń sany bar-joǵy 17 mln. adam ekenin eskersek, onyń árbir tulǵasynyń, árbir janynyń óz orny, ózindik salmaǵy bolýy, sol salmaǵy bilinip turýy qajet. Sondyqtan da, men Qazaqstanda barlyq deńgeıdegi ulttyq bilim berý isterine tolyq áleýetti jumsaı otyryp qana ózderi bettegen maqsatqa qol jetkize alatynyna senimdimin. Men bul jerde bolashaqta munaı men gazdan barynsha táýelsizdenip, kerisinshe ınnovatsııalyq, zııatkerlik ekonomıkaǵa, tehnologııaǵa arqa súıegisi keletin el týraly aıtyp otyrmyn. Óıtkeni, bolashaqta ekonomıka ósiminiń qarqyny elde óndiriletin resýrstardy, shıkizat kenderin shapshań satýmen baılanysty bolmaıdy. Bul rette Prezıdent N. Nazarbaev máseleni durys kórsetip, ondaıǵa der kezindegi shekteýdiń qajettigin aıtyp otyr», - dedi A. Gýzenbaýer.
Onyń aıtýynsha, bolashaq ekonomıkalyq damý mindetti túrde adamı kapıtaldan, adamı resýrstar týdyratyn ınnovatsııalar men tehnologııalardan turǵanda ǵana ondaı damý turlaýly bolady.
