Bolashaq chempıondardy daıyndaý úshin bastapqy irgetas durys qalyptasý kerek - Erbol Myrzabosynov
ASTANA. KAZINFORM - QR Týrızm jáne sport mınıstrligi Sport jáne dene shynyqtyrý isteri komıtetiniń tóraǵasy Erbol Myrzabosynov respýblıkalyq sporttyq mektep-ınternat-kolledjderdiń basshylarymen qyzmettik jınalys ótkizdi.
Atalmysh mekemeler joǵary sportqa REZERV daıyndaıtyn birden-bir negizgi baspaldaq.
Kún tártibinde oqýshylardyń mektep tabaldyryǵyn attaǵannan bastap, keleshek el chempıondaryn qalyptastyryp shyǵýyna uıtqy bolatyn negizgi faktorlardy damytýdyń joldary qarastyryldy. Jumys barysyndaǵy olqylyqtar men keleńsizdikterdiń aldyn alý boıynsha mańyzdy qadamdar aıqyndalyp, birqatar tapsyrmalar berildi.
Atap aıtqanda: jattyqtyrýshylardyń sapalyq quramyna taldaý jasap, biliktiligi joǵary mamandardy tartý, sondaı-aq daıyndaý ádisterin jetildirý maqsatynda jumys tobyn quryp, toqsan saıyn mamandardyń biliktiligin arttyrý kýrstaryn uıymdastyrý jaıly aıtyldy.
Selektsııa jasaqtaý úshin Respýblıka boıynsha talantty sportshylardy izdeý maqsatynda komıssııa quryp, óńirlerden irikteý jumystaryn júrgizý qajettigi jetkizildi. Osy arqyly aımaqtardaǵy daryndy balalardyń úlken sportqa kelýine jol ashylady.
Internattardaǵy sport túrlerin sporttyq bazalaryna sáıkes ońtaılastyrý alǵa qoıyldy. Mysalǵa Almaty qalasynda ornalasqan Q.Ahmetov atyndaǵy ORRMMIK-te 17 sport túri bar. Olardyń 7-niń tolyqtaı sportpen shuǵyldanýyna jaǵdaı jasalǵan, qalǵan 9-nyń sporttyq bazasy talapqa saı kelmeıdi. Osyndaı mekemege tıesili sporttyq nysannyń bolmaýy saldarynan oqýshylar qashyqta ornalasqan sport keshenderinde shynyǵýǵa májbúr. Bul oqýshylardyń sabaq pen shynyǵý arasynda durys tynyǵýyna jáne qalpyna kelýine keri áserin tıgizedi.
Qazirden bastap sportshylarǵa oń stımýl berý úshin tájirıbesi mol ulttyq quramalarmen birlesken oqý-jattyǵý jıyndaryn ótkizý múmkindigin arttyryp, sporttyq medıtsınalyq kómek boıynsha tıimdi jumystar júıesin qaıta qaraý kerektigine basa nazar aýdaryldy. Sebebi kez-kelgen sporttaǵy joǵary nátıje sportshy densaýlyǵynyń durys qalyptasýyna baılanysty. Bul ásirese balalar sportynda mańyzdy. Sol sebepti dáriger mamandardyń biliktiligin qaıta qarastyryp, qajet bolǵan jaǵdaıda Ulttyq sporttyq medıtsına jene ońaltý ortalyǵynyń mamandaryn jumyldyrý kerektigi aıtyldy.
«Bizdiń mınıstrlikke qarasty tórt mektep-ınternat-kolledj ben bir respýblıkalyq sport kolledj bar. Búginde joǵary sportqa rezerv daıyndaıtyn basty baspaldaq mekemeler osylar. Keleshek chempıondar da osy jerde egjeı-tegjeıli daıyndalady. Demek bastapqy fýndament durys qalyptasý kerek. Qazir keıbir ınternattardyń daıyndyq bazalary zamanýı talapqa saı bolmaǵandyqtan tolyqqandy shynyǵýyna qolaısyzdyq týǵyzýda. Sol sebepti sport túrlerin júıelendirý boıynsha baza múmkindikterine saı shoǵyrlandyrýymyz qajet. Osyndaı múmkindik arqyly qaıtalanatyn sport túrlerin azaıtyp, sapaly sportshylar quramyn daıyndaıtyn bolamyz. Mysaly «Shańyraq» mektep-ınternat-kolledjinde semserlesý sporty yńǵaısyz, tar jerde daıyndalyp jatyr. Odan da ony bazasy qalyptasqan K.Ahmetov atyndaǵy mektep-ınternat-kolledjinde damytqan jón. Sondaı-aq, bul sporttyq mekemede dzıýdo sportynan etene damyǵan ortalyq bar. Al Rıdderde qysqy sport túrlerin damytamyz. Qazir ol jerde bazasy joq bolsa da jeńil atletıka boıynsha sportshylar daıyndalýda. Bul sport túriniń durys damýyna kedergi. Odan da ony ShQO-da bazasy qalyptasqan ınternatqa bergenimiz jón. Sebebi O. Rypakova atyndaǵy sport ortalyǵy sııaqty jaǵdaıy jasalǵan keshenderde shynyǵady. Bul bir ǵana mysal», – dedi komıtet tóraǵasy E.Myrzabosynov.
Bul atalǵan máseleler keleshekte joǵary sport rezervin qalyptastyrýda aıtarlyqtaı ról atqarady. Qazir Respýblıka boıynsha jalpy 19 ınternat bar. Onyń 5-i respýblıkalyq, qalǵandary jergilikti basqarmaǵa baǵynyshty.
