«Bolashaq» boıynsha taǵylymdamadan ótetinderge qoıylatyn talap ózgerdi
2023 jyly densaýlyq saqtaý, mádenıet, sport, týrızm, agroónerkásiptik keshen qyzmetkerleri, mektep, kolledj pedagogteri, ınjener-tehnıkter, memlekettik qyzmetishler, sondaı-aq buqaralyq aqparat quraldarynyń qyzmetkerleri úshin taǵylymdama baǵdarlamasyna 110 «Bolashaq» stıpendııasy bólindi.
«Halyqaralyq baǵdarlamalar ortalyǵy» AQ qujat qabyldaýdy júrgizedi.
«Bıyl taǵylymdamadan ótýshilerge qoıylatyn talaptar kúsheıtildi. Endi olar konkýrsqa qatysý úshin shet tili boıynsha emtıhan tapsyrǵany týraly sertıfıkat usynady. Bul «Bolashaq» stıpendııasyn taǵaıyndaý konkýrsyn jetildirýge múmkindik beredi. Sonymen qatar úmitkerlerdiń jalpy jumys ótili úsh jyldan kem bolmaýy kerek. Sońǵy 12 aıda tańdaǵan mamandyǵy boıynsha jumys isteýge tıis. Sondaı-aq qabyldaýshy sheteldik uıymnan shaqyrý jáne keminde V1 deńgeıindegi memlekettik tilden emtıhan tapsyrǵany týraly sertıfıkat talap etiledi», - dep habarlady Ǵylym jáne joǵary bilim mınıstrligi Halyqaralyq yntymaqtastyq departamentiniń dırektory Lázzat Ádilova.
Bıyl «Bolashaq» baǵdarlamasynyń basym mamandyqtar tizimi taǵylymdamadan ótýge arnalǵan 162 mamandyqty kózdeıdi. 2023 jyly tizimge «Bultty servıster», «Ǵarysh júıeleri men ınjenerııa», «Gıdrogeologııa», «Pretsızıondy medıtsına», «Testologııa» jáne t.b. suranysqa ıe mamandyqtar engizildi.
Aıta keteıik, «Bolashaq» baǵdarlamasy aıasynda shetelge taǵylymdamaǵa jiberiletin stıpendıattar kepilge múlik qoımaıdy. Mindettemelerdi oryndaý úshin eki garant usyný ǵana jetkilikti. Sońǵy 12 aıda turaqty tabysy bar, jasy 50-ge tolmaǵan QR azamaty úmitkerge garant bola alady.
Ótinimder Egov.kz memlekettik qyzmetter portaly arqyly qabyldanady. «Bolashaq» stıpendııasyn taǵaıyndaý konkýrsyna qatysýǵa qujattardy kelesi silteme arqyly tapsyrýǵa bolady.
Eske salsaq, jýrnalıster de «Bolashaq» baǵdarlamasy arqyly taǵylymdamadan óte alady.
