Bolashaq bıologterge arnalǵan ınteraktıvti platforma ázirlendi
ASTANA. KAZINFORM — Qazaq ulttyq qyzdar pedagogıkalyq ýnıversıteti Bıologııa bilim berý baǵdarlamasynyń PhD 3-kýrs doktoranty Gúlmıra Eshımbetova botanıka páni boıynsha oqý-dala praktıkasyna arnalǵan zamanaýı tsıfrlyq platformany ázirlep shyǵardy.
Ǵylym jáne joǵary bilim mınıstrliginiń baspasóz qyzmeti atap ótkendeı, joba bolashaq bıologııa mamandarynyń zertteýshilik daǵdylaryn qalyptastyrýǵa, oqý protsesin tsıfrlandyrýǵa jáne praktıkalyq sabaqtardyń mazmunyn jetildirýge baǵyttalǵan.
Ǵylymı jobanyń júzege asýyna Jaratylystaný ınstıtýtynyń dırektory, aýyl sharýashylyǵy ǵylymdarynyń kandıdaty, professor Gaýhar Baıtasheva jetekshilik etse, avtorlar quramynda Gúlmıra Eshımbetova jáne Laıla Anýarova birlesip jumys atqardy.
— Platforma botanıka páni boıynsha oqý-dala praktıkasyn jańa formatta uıymdastyrýǵa múmkindik beredi. Tsıfrlyq júıe arqyly stýdentter tabıǵı ortada ósimdikterdi baqylap, olardyń morfologııalyq, bıologııalyq jáne ekologııalyq erekshelikterin jan-jaqty taldaı alady. Sonymen qatar bilim alýshylar derbes ǵylymı-zertteý jumystaryn júrgizip, málimetterdi jınaqtaý, salystyrý jáne qorytyndy jasaý daǵdylaryn meńgeredi, — delingen habarlamada.
Jobanyń basty erekshelikteriniń biri — árbir taqyryptyq bólimniń naqty qurylymdalýy. Platformada praktıkalyq tapsyrmalar, zertteý baǵyttary, baqylaý jumystary jáne baǵalaý krıterııleri júıeli túrde engizilgen. Bul stýdentterdiń oqý jetistikterin obektıvti baǵalaýǵa, ózin-ózi saralaý jáne refleksııa jasaý qabiletterin damytýǵa múmkindik beredi.
Sondaı-aq tsıfrlyq platforma oqý protsesiniń ıkemdiligi men qoljetimdiligin arttyryp, bilim alýshylar men oqytýshylar arasyndaǵy ózara baılanysty kúsheıtedi. Interaktıvti format stýdentterdiń pánge degen qyzyǵýshylyǵyn arttyryp qana qoımaı, olardyń synı oılaý, taldaý jáne ǵylymı paıym jasaý quzyretterin damytýǵa yqpal etedi.
Joba nátıjesinde botanıka páni boıynsha oqý-dala praktıkasynyń mazmuny jańaryp, bolashaq bıologııa mamandaryn daıarlaýdyń sapasyn arttyrýǵa baǵyttalǵan tıimdi bilim berý alańy qalyptasty.
Osyǵan deıin qazaqstandyq ǵalymdar ımmýnıtetti nyǵaıtatyn bıologııalyq qospa ázirlep jatqanyn jazǵanbyz.
