«Bolashaq» basshysynyń ústinen túsken shaǵymǵa qosylǵan joqpyz - Tileýbergenov
ASTANA. QazAqparat - Búgin «Halyqaralyq baǵdarlamalar ortalyǵy» AQ-ynda ótken baspasóz máslıxatynda birqatar qyzmetkerler ortalyq basshynyń ústinen túsken shaǵymǵa qosylmaǵanyn mádimdedi, dep habarlaıdy QazAqparat tilshisi.
«Men ózim - «Bolashaq» baǵdarlamasynyń túlegimin. Osy jerde úsh aıdaı jumys istedim. Meni jańa basshylyq shaqyrǵan. Biz «Bolashaq» baǵdarlamasyna qatysty zertteý-taldaý jumystaryn júrgizdik. Keshegi xatta meniń de esimim júr. Biraq meni jumystan eshkim qýǵan joq. Men úsh aılyq jobany atqarý úshin kelgenmin. Sony aıaqtaǵan boıda óz erkimmen basqa jaqqa kettim. Al ortalyq basshysyna qarsy jazylǵan xatta meniń aty-jónimdi qosyp jibergen. Menen eshkim ruqsat suraǵan da joq. Qolymdy da qoıǵan joqpyn», - deıdi Іlııas Tileýbergenov.
Onyń aıtýynsha, jańa basshylyq ony qaldyrǵysy kelgen. Bólim basshynyń qyzmetin de usyndy. Alaıda Іlııas «Bolashaq» baǵdarlamasy aldyndaǵy óz qaryzyn ótep bergennen keıin jeke kásippen aınalysqandy jón kórdi.
Al Samal Qamarına ortalyqta áli istep jatyr. Alaıda onyń esimi de xatta júr.
«Men konkýrstyq protsedýralar departamentin basqaramyn. Hatta meniń jumystan ketip jatqanym jaıynda jazyldy. Iá, men keteıin dep jatyrmyn. Alaıda maǵan eshkim qysym jasaǵan joq. Departamentte isteıtin qyzmetkerler de óz erkimen ketip jatyr. Men ózim osy jerge 11 jyl buryn kelgenmin. Qarapaıym menedjer qyzmetinen departament basshysyna deıin óstim. Biraz nársege úırendim. Endi, basqa jaqtan usynys túsip jatyr. Negizi, men ótken jyly jeltoqsana aıynda ketemin de oılaǵanmyn. Alaıda qazirgi basshylyq meni ustap qaldy», - dedi Qamarına. Ol da jelide taraǵan shaǵymǵa qol qoımaǵany jaıynda aıtyp otyr.
Aıta keteıik, buǵan deıin «Halyqaralyq baǵdarlamalar ortalyǵy» AQ bir top qyzmetkeri ortalyq basshysy Janbolat Meldeshovtiń tarapynan zańǵa qaıshy áreket jasalǵany jáne dórekilik tanytqany úshin shaǵymdanǵan bolatyn. Buqaralyq aqparat quraldarynda sol jınalystyń vıdeosy da jarııalandy. QR Bilim jáne ǵylym mınıstrligi ortalyq qyzmetkerleriniń shaǵymyna baılanysty keshendi qyzmettik tekseris ótkizetindigin málimdedi. Tekseris nátıjeleri anyqtalǵansha, «HBO» Prezıdenti Janbolat Meldeshov óziniń qyzmettik mindetterin oryndaýdan ýaqytsha shettetildi.
