Bolashaq» baǵdarlamasynyń túlekterin jumysqa ornalastyrý máselesi talqylandy
ASTANA. 23 aqpan. QazAqparat - QR Parlamenti Májilisiniń otyrysynda «Bolashaq» baǵdarlamasynyń túlekterin jumysqa ornalastyrý máselesi kóterildi.
Osyǵan oraı QR Bilim jáne ǵylym mınıstrligi tómendegideı túsinik beredi.
2005 jyldan bastap «Bolashaq» baǵdarlamasy boıynsha 2913 adam bilim aldy. Olardyń 2453-i jumysqa ornalasqan. Onyń ishinde memlekettik organdarda 155, memlekettik mekemelerde - 178, ulttyq kompanııalarda, memlekettiń qatysýyndaǵy kompanııalarda - 402, jeke kompanııalarda - 1647, halyqaralyq uıymdarda - 45 jáne kommertsııalyq emes uıymdarda 26 túlek jumys isteıdi. Bular 2006-2010 jyldary sheteldik oqý oryndaryn bitirgender.
Baǵdarlama stıpendıattary memlekettik qyzmetke turý barysynda basymdyqqa ıe. Olar konkýrstyń jarııalanǵanyn kútpeı-aq memlekettik qyzmet rezervine tura alady. Bul úshin olarǵa tek qana QR Konstıtýtsııasy men birqatar zańdar boıynsha test tapsyrsa bolǵany. «Bolashaq» baǵdarlamasynyń barlyq túlekteri jumysqa ornalasý barysynda joǵary múmkindikke ıe. Óıtkeni olar jaqsy bilim alǵan jáne shetel tilderin erkin meńgergen.
Qazirgi tańda jumysqa ornalasý úrdisinde «Bolashaq» baǵdarlamasynyń 460 túlegi bar. Olar 2010 jyldyń sońy men 2011 jyldyń basynda oqýyn aıaqtaǵan stıpendıattar.
Qazirgi ýaqytta oblys ortalyqtarynda «Bolashaq» baǵdarlamasy aıasynda daıyndalǵan kadrlar mardymsyz. Túlekterdiń 85 paıyzynan astamynyń Astana men Almaty qalalarynda jáne iri oblys ortalyqtarynda jumysqa ornalasýy eńbek naryǵyndaǵy suranysqa baılanysty. Óıtkeni olardyń basym bóligi qarjy jáne menedjment, ınjenerlik-tehnıkalyq mamandyqtar, joǵary bilim berý salasyndaǵy ǵylymı-pedagogıkalyq baǵyttar boıynsha bilim alǵan. Osylaısha «Bolashaq» baǵdarlamasynyń túlekteri úshin áleýetti jumys berýshiler elordada jáne oblys ortalyqtary men iri qalalarda shoǵyrlanǵan.
