«Bolashaq» baǵdarlamasynyń túlekteri eldiń ınnovatsııalyq damýyna belsendi atsalysady - Elbasy Joldaýyna pikir
Elbasynyń «Jańa onjyldyq- jańa ekonomıkalyq órleý - Qazaqstannyń jańa múmkindikteri» atty Joldaýyna qatysty óz pikirin bildirgen «Qazaqstan Prezıdentiniń «Bolashaq» halyqaralyq stıpendııasy túlekteriniń qaýymdastyǵy»qoǵamdyq birlestiginiń atqarýshy dırektory Janna Tólegenova osylaı aıtty.
«Memleket basshysy óziniń Joldaýynda eldiń ótken on jyldaǵy áleýmettik-ekonomıkalyq damýynyń qorytyndysyn shyǵardy. Óziniń kúshine senip jáne tolyǵymen strategııalyq maqsattarǵa súıene otyryp, Qazaqstan halqynyń ómir súrý sapasyn arttyrýda negizgi máselelerdi sheshe aldy. Qazir - nátıjelerge baǵa berip, taldaý jasap, jańa sheshimderdiń qabyldaný kezeńi», - dep atap ótti ol.
J.Tólegenovanyń aıtýynsha, syrtqy ekonomıkalyq qıyndyqtarǵa qaramastan Qazaqstan damýdyń jańa kezeńinde tur. Al aldaǵy onjyldyqty ınnovatsııalardyń, ındýstrııalandyrý men halyqtyń birigý kezeńi dep ataýǵa bolady. «Moıyndalǵan halyqaralyq tájirıbeler men Qazaqstannyń jınaǵan tájirıbesi ınnovatsııany damytýdyń negizi bolyp tabylady. Al qazaqstandyq tájirıbege ıe «Bolashaq» baǵdarlamasynyń túlekteri ınnovatsııalyq úrdisterdiń qozǵaýshy kúshi retinde shyqpaq», - dedi.
J.Tólegenovanyń atap kórsetýinshe, Qaýymdastyqtyń bıylǵy jylǵy jumysy ınnovatsııalyq mádenıet pen qazaqstandyq jastardyń jan-jaqty qalyptasýyna septigin tıgizetin - áleýmettik bastamalarǵa jańa tehnologııalardy endirýge baǵyttalmaq.
