«Bolashaq» baǵdarlamasynyń túlegi jetisýlyqtarǵa óner kórsetti
TALDYQORǴAN. QazAqparat - Taldyqorǵanda vırtýoz-pıanıst, halyqaralyq baıqaýlardyń laýreaty Danııar Esimhanovtyń shyǵarmashylyq keshi ótti, dep habarlaıdy QazAqparat tilshisi.
Taldyqorǵandaǵy Іlııas Jansúgirov atyndaǵy mádenıet saraıynda alǵashqy ret qazaq ulttyq aspaptary men fortepıano qatar oınady. Klassıkalyq mýzyka keshinde Muqan Tólebaev atyndaǵy ult aspaptar orkestri men halyqaralyq baıqaýlardyń laýreaty, vırtýoz-pıanıst Danııar Esimhanov óner kórsetti.
«Bolashaq» baǵdarlamasynyń túlegi tyńdarmandarǵa otandyq jáne álem klassıkteriniń týyndylaryn sheber oryndap berdi. Sondaı-aq bul keshte kompozıtor-dırıjer, Qazaqstannyń eńbek sińirgen qaıratkeri Álı Alpysbaevtyń fortepıano men orkestrge jazǵan «Oı tolqyndary» atty shyǵarmasynyń tusaýy kesildi.
Danııar Esimhanovtyń aıtýynsha qazirgi tańda fortepıano men ulttyq aspaptarǵa mýzyka jazǵan kompozıtorlar sanaýly. Birinshi bolyp, professor Naǵym Meńdiǵalıev jazsa, ekinshi astanalyq jas kompozıtor Arman Jaıymdy atap ótýge bolady. Endi mine jetisýlyq sazger Álı Alpysbaevtyń týyndysy tyńdarmanǵa jol tartty. Kesh qonaǵy «Oı tolqyndary» shyǵarmasynyń melodııasy baı, garmonııalary óte qyzyqty jáne óte kúrdeli ekenin atap ótti.
